Aizawl: 4-Star aia hniam lo hotel-a Tourist Lodge, Chaltlang dinna tur, concession agreement chu Thawhlehni khan Mizoram tourism department leh M/s Hotel Polo Towers Ltd., Shillong, Meghalaya-ten an ziak.
‘Development of 4-Star or Higher Category Hotel at Tourist Lodge, Chaltlang, Aizawl, Mizoram on Design, Build, Finance, Maintain, Operate, Manage & Transfer (DBFMOMT) Basis’ hnuaia hmalakna hi DoNER ministry leh planning & programme implementation department bultan a ni a, February 19, 2024 khan Kolkata-ah road show neiin Mizoram sorkar chuan tourist lodge chu changtlung zawka siam a nih theih nan PPP Mode-a kalpuina tur ruahmanna a siam a. Tihhlawhtlin a nih theih nan ministry hnuaia Invest India-in hma an lakpui a ni.
Inremna hi Chief Minister’s Office-ah ziah a ni a. Sorkar aiawhin Vanlaldina Fanai, Commissioner & Secretary, Tourism Department-in hming a ziak a, company aiawhin Prashant Gupta, Chief Financial Officer & Whole-time Director, Hotel Polo Towers Ltd.-in a ziak a. Dr. Lalrinchhana, Principal Adviser cum Addl. Secretary, Planning; department officer-te, Hotel Polo Towers Ltd. aiawhte leh Invest India aiawhte an tel.
Inremna ang chuan Hotel Polo Towers Ltd. hian kum 30 chhung atan DBFMOMT basis-in hna an thawk ang a, kum 10 dang tum hnih pawh sei theih a ni ang a. Hotel-ah hian pindan 60 (pindan 40 danga tihlen belh theih) tal awm tur a ni a, darkar 24 inhawng, multi-cuisine coffee shop, specialty restaurant, lounge leh Executive Health Club (gym leh spa facility awmna) te nei ngei tura tih niin, 5-Star hotel-a hlan kai theih tura kalpui tur a ni.
Inremna ziah atanga ni 45 chhungin a hmunhma hi Hotel Polo Towers Ltd. hnenah hian hlan tur a ni ang.
Mizoram sorkar chuan Hotel Polo Towers Ltd nena inremna hi siam mah se a hmunhma hi sorkar ta a la ni reng dawn a ni.