ZPM Thalai General Headquarters chuan chuan economics & statistics (E&S) directorate building chu a sak hna a chhiat em avanga siam that nana sorkarin Rs. 2,01,30,637 a seng chu tlawmthlak an tih thu a sawi.
ZPM Thalai Vice President Isaac Lallungawia Rokhum chuan Thawhlehni khan Aizawl Press Club-a thuthar lakhawmtute a kawmnaah hei hi a sawi.
Mizoram State Project Monitoring Committee (MSPMC) inspection report tar lan danin building hi a him tawk lo a ni tih chu MNF sorkar lai, kum 2022 khan hmuhchhuah a lo ni tawh niin a sawi a. PWD Quality Control Division-in Non-Destructive Test (Rebound hammer) hmanga an enfiahnaah concrete chak zawng, M20 grade tling turah M10 pawh a phak lo tih finfiah a nih thu a sawi.
PWD E-in-C hlui, Bowman-a pawhin ‘structure failure’ leh chhiatrupna thleng thei warning ‘sheer crack’ a awm hmuin retrofitting ti vat turin a lo hriattir tawh a; mahse, MNF sorkar khan an minister hlui, Robert Romawia Royte hmingchhiat thup nan hma an la zui duh lo niin an ngai tih an sawi.
MSPMC leh Accountant General (AG) audit report zirchiannaah dan leh inkaihhruaina zawm miah lovin Rs. Vaibelchhe 6 senga sak hna hi NECS hnenah pek a ni tih tar lan a ni a. Third party monitoring leh measurement (tehna) pawh la miah lovin bill hi pek tawp a ni chu ZPM Thalai chuan eirukna lian takah an ngai tih a sawi bawk.
ZPM Thalai Gen. Hqrs chuan director hnenah DPR leh drawing-te dil mah se department hian hetiang document pawimawh an nei miah lo chu mak an tih thu leh Congress sorkar lai atanga puanhnuai thil dik lo a awm an rinhelh thu an sawi.
MSPMC chuan thil dik lo finfiahna hmuh tur a awm kim tawh avangin contractor (NECS/Robert Romawia Royte) pawh dan anga hremna lek ngei a tul thu sorkarah a thlen a, ZPM Thalai chuan zaa zain an thlawp a, ram leh mipui nunna tana hlauhawm khawpa hna tha lo thawktu leh eirukna liana inhnamhnawihte chu an phu tawk hremna pe ngei turin sorkar an phut tih a sawi.
MINECO-a Economics & Statistics Directorate building hi 2014-2016 chhunga NECS, Aizawlin ‘turnkey basis’ a an thawh nia report a ni a. Kum 2016 khan sa zovin department-ah an hlan a ni.