Kerala-a Wayanad district-a Anakkompoyil-Meppadi tunnel project site-a lei nasa taka minin state dang atanga inhlawhfa pathum a chhilh hlum hnuah mi dang panga chin hriat lohva awmte chu zawn chhunzawm zel an ni.
Wayanad Superintendent of Police Devamanohar-a chuan Thawhlehnia chhiatna thlengah hian ‘unnatural death case’ ziah luh a nih thu leh chhui zui mek a nih thu a sawi.
National Disaster Response Force (NDRF) leh Fire & Rescue Services-a thawkte telna search team chuan ui fingte nen hna an thawk mek.
Chooralmala panna kawngpui chu then fai tawh a ni a; mahse, thuneitute chuan lei min tam tak a la awm tih sawiin mi zawn hna thawh zawh a nih hma chuan then vek theih a ni lo tih an sawi.
Ruah sur chhunzawm zelin chhanchhuah hna thawh a timuang hle bawk tih an sawi.
Thawktu thi pathumte hi Madhya Pradesh, Bihar leh Jharkhand atanga kalte an ni a. Meppadi WIMS Hospital-ah hliam mi pasarih enkawl mek an ni bawk.
Thawhlehni khan Kalladi bula leiverh siamna hmunah hian ruah sur nasa tak avangin lei a min a. Kerala State Disaster Management Authority (KSDMA) chuan hna thawh hi khaw awm dan azir loh avangin a hma ni khat chawlhsan a ni tih a lo sawi tawh.
Kerala sorkar chuan ‘mihring siam chhiatna’ tiin a sawi a, district thuneitute leh Public Works Department Minister PK Basheer-a’n thupek a pek nawn fo hnuah pawh sakna hmuna leivungte chu lak sawn a ni lo niin an sawi.
A siamtu company general manager erawh chuan leivungte hi paih a ni a, chhiatna thlen phahna a ni lo tih a sawi.
Chhanchhuah hna thawktu pakhat erawh chuan lei min hi tlang chhip a nih laiin hna thawhna hmuna lei tam lutuk chuan a tinasa zual niin a sawi ve bawk.
Chief Minister VD Satheesan-a chuan Nilaini tlai khan a tlawh a. Anakkompoyil-Meppadi tunnel project chu chhiatna thlen chhan zirchian a nih hnuah chauh thawh chhunzawm turin a ti bawk.
Anakkompoyil-Meppadi twin tunnel project hi Kerala-a Malappuram leh Wayanad district-te inkalpawhna tihchangtlun tumna a ni a. A hmun hi Mundakkai bulah a awm a, kum 2024-a lei min nasa tak thlenga mi 300 vel thihna hmun a ni.