Aizawl: Mizoram Police Subordinate Officers’ Association (MPSOA) chuan Mizoram sorkarin tun hnaia hnathawk a laknaah dik taka a thiam leh a tlingte chauh lak an ni thin chu lawmawm an tih thu an sawi.
MPSOA, General Headquarter chuan August 25, 2025 atanga training mek, Mizoram Police Constable 259 (Unarmed/Armed/Mechanic) laknaah pawh party leh mi mal induhsakna tel hauh lovin a tling leh tithate ngei lak an ni chu lawmawm an ti a, Mizoram sorkar chungah thinlung takin lawmthu an sawi tih Nilainia thu an chhuahah an tar lang.
“Mizoram Police Manual 2005 hman hnuah a vawi khat nan, kum 19 ral hnuah Mizoram Police Manual 2005 ang thlapa Class X (HSLC) pass chinte constable atana lak an ni chu Mizoram Police tan hmasawnna mellung pawimawh tak a ni,” an ti.
MPSOA tuna SI (UB) post 25 recruitment kalpui mek te, approval awm tawh recruitment la kalpui leh tur – SI (UB) leh ASI (UB), ASI (M), Constable 350 (UB-150, AB-200)] ah te pawh dik tak leh huaisen taka kal turin sorkar an ngen bawk.
Subordinate level rank hrang hranga post ruak – SI (UB) 62, ASI (UB) 33, Constable 756 (UB), ASI (M) 120, MPRO (H/C 230, Constable (32), F&ES 57 & Constable (AB) 2,757, a vaiin 4,047 vel awm mekte pawh hnawh khah thuai a nih theih nana hma laksak leh turin sorkar an ngen.
Mizoram sorkar-in ‘Assistance to States & Union Territories for Modernisation of Police’ (ASUMP) Scheme kaltlanga Mizoram Police te hman tur motor thar 219 an pe chu lawmawm an tih thu an sawi a. Ground level-a police hna bulpui ber thawktu police station, out-post leh beat post 60-in a ruala motor thar an dawng vek thei chu ropui tiin lawmthu an sawi.
Hmasawnna thar Mizoram Police-in an neih theihna tura theihtawp chhuaha hmalatute, Mizoram sorkar hruaitu, a bikin chief minister, home minister leh a thawhpui home department officer leh staff-te chungah te MPSOA chuan lawm thu an sawi bawk.