Aizawl: AMC chuan an huam chhunga hotel leh home stay neitute pualin Ningani khan bawlhhlawh sawngbawlna dan thar, Solid Waste Management (SWM) Rules, 2026 hmelhriattirna, zirtirna leh waste generator te mawhphurhna hrilhfiahna hun AMC Auditorium-ah an buatsaih.
He hunah hian hotel leh home stay neitu 152 an tel.
Joseph H. Lalramsanga, Municipal Commissioner, AMC kaihhruaia hun hmanah hian khuallian, Aizawl Mayor H. Lalremtluanga chuan SWM Rules, 2026 chu mipuite thawhhona zarah hlawhtling taka kalpui a nih leh ngei a beisei thu sawiin thawhhopuiah hotel leh home stay neitute a sawm.
C. Lalmuanawma, Town Planner, AMC; Veronica Vanlalhriatpuii Colney, Assistant Architect, AMC leh Kennedy Vanlalnunmawia, Assistant Engineer, Aizawl Smart City Ltd. ten SWM Rules, 2026-in bawlhhlawh thliar hran dan tur te, sawngbawl dan tur leh waste generator mawhphurhna an sawi a. Bawlhhlawh ngah zual te chungchang te, chi lia bawlhhlawh thliar hran tur thu te, a khawn khawm dan tur leh pawimawh dangte ngaihthlak a ni.