Aizawl: Chamdur I Presbyterian Biak In chei that hna thawk mektu (sub contractor), Labiakzuala, Thingsai, Hnahthial district, tuna Salem Veng Aizawl-a cheng mek suam a nih dan chu Mizoram Police chuan finfiah a la ni lo a, chhui zui zel an tum tih an sawi.
Thawhlehni khan Lalbiakzuala hi Bolisora-a mamawh lam tura a kal haw lam chu Chamdur ‘P, Lawngtlai district daiah tu tih hriat loh ralthuam keng mi pariatin an lo suam thu police-in an dawng a. A sawi danin heng mite hi ramhnuai atanga chhuakin an dap a, a lo tan deuh avangin silai kawmin an chhu a, rakzu fun nga leh pawisa Rs. 600 laksakin an tlan bo va. A sawisatu zinga mi pathumte chuan AK rifle kengin mi dangte hian ulhbun bakah tualchher silai an keng niin a sawi.
Ruah sur a chawlh loh avang leh kawng chhia avangin police chuan tual chhung NGO hruaitute awm laiin Lalbiakzuala hi video call hmangin thu an zawt fiah a. Hetah hian a sawisatute chuan thawmhnaw hring dal hain boot an bun deuh vek a, an sam a sei a, ‘Shanti’ tih thumal an lam ngun hle niin a sawi.
YMA-te ngenna angin, a tuartu hi Primary Health Centre-ah medical examination tih a ni a, health worker-te chuan a taksaah hliam hmuh theih, duk emaw, pilh emaw engmah a awm loh thu an report a ni.
Nilaini khan Vasei Police Station atangin Officer-in-Charge hovin Chamdur ‘P’-ah kalin thil awm dan chhui a a ni a. Thil thlenna hmun nia sawi pawh tlawh niin a tuartu leh he thil kaihhnawiha thuhretute thu zawh fiah an nih bakah finfiah zel a ni a. Rinhlelhawm deuhte pawh thu zawh fiah niin heng mite erawh hi chu an inhnamhnawih lo nia hriat zui leh a ni.
Chhui zui zelna atangin Lalbiakzuala hian mi dang kaltlangin Bolisora-a mi hi zu a lei ngei tih finfiah a ni a. Hemi hnua zu lei belh tura Bolisora-a a kal nawn leh nia a insawi erawh a zuartute chuan an hriatpui loh thu leh hemi hun lai vel hian lo lamah hna an thawk a, tu hnenah mah zu an hralh loh thu an sawi.
Chhui chian a nih hnu hian Lalbiakzuala thu leh a hmuna awm thuhretute sawi dan thil inmil lo a awm nual tih hriat a ni a. A chhungkhat hnai pakhat hnen atangin amah hi zuin a tihbuai leh zu in nasa a ni tih hriat a ni a, police leh NGO-ten an zawh fiah laite pawh hian a thawhpui that duh loh bakah tum hnih ngawt tlan bo a tum niin sawi a ni.
A tuartu thusawi inmil tawk lo nia lang te, kut tawrhna hliam hmuh tur awm lo te, thuhretute thil sawi dan nena inpersan thil a awm avang leh thil chhui tawh chin atang hian he insuamna hi tun thleng chuan finfiah loh a la ni a. Police chuan chhui zui zel an tum.