Aizawl: Commerce & Industries Minister F Rodingliana chuan Nilaini khan Union State Commerce & Minister Jitin Prasada hmuin Mizorama advances testing facility din dan tur a sawipui.
New Delhi a cham mek, C&I minister hian Prasada hi a office, Vanijya Bhawan-ah a kawm a. Advanced testing facility din chungchang sawipuiin July 3-a Board of Trade Meeting-a Union Commerce & Industry Minister Piyush Goyal-a’n India hmun hrang hranga agriculture & food testing laboratory din tur a sawi a bawhzui nghal thu a hrilh a. A bikin sawhthing, aieng leh hmarcha sawngbawlna lama Mizoram hmalaknate hrilhin quality leh standard monitoring-na atan te, ram pawna thawn chhuahna atan validation leh certification atan a mamawh a nih dan te minister hi a hrilh a ni.
Union Minister Prasada hian ministry-a proposal thehlut turin leh a lo bawhzui tur thu a hrilh a. Mizo hnam incheinate nalh a tih thu sawiin GI Tagging ti ngei turin minister hi a lo chah bawk.
Power & electricity minister ni bawk, F Rodingliana hian Tuivai Hydel Project tihhlawhtlinna tura hmachhawpte bawhzuiin mi pawimawhte a kawm kual bawk a. Pankaj Agarwal, Union Power Secretary bakah Vumlunmang Vualnam, Secretary leh D Anandhan, Addl. Secretary, Department of Expenditure, Finance Ministry te kawmin hydel project siamna tur sum ruahman dan tur a sawipui.
Ministry of Expenditure hian Transaction Adviser, Ernst & Young LLP ten an buatsaih Tuivai Detail Project Report (DPR) leh financial structuring te an lo zirchian hnuah sawiho vat turin thu dah a ni.
Minister hi K Lalrinzuali, Commissioner & Secretary leh Laltlanthanga, Chief Engineer (System Operation) ten an tawiawm.