Aizawl: Sports Minister Lalnghinglova Hmar chuan Ningani chawhnu khan Mizoram State Sports Council (MSSC) leh Samagra Shiksha Mizoram (SSM)-in ‘convergence’-a an kalpui, Grassroots Sports Development Programme (GSDP) zirchianna hrang hrang awmna report chu MINECO-a a office-ah a tlangzarh.
Lalnghinglova Hmar chuan GSDP chu an hmalakna phurawm ber zinga mi a nih thu a sawi a. “Zirna inah naupangten infiamna inzirtirna tha an dawng thei hi a thain a rah hi tun atanga kum ngaah chuan kan hmu tawh dawn a ni,” a ti.
Minister chuan he programme hi thui tak thlir chungin state leh naupangte mamawh mila her rem a ni a. Zirna tibuai si lova infiamna lama hmasawnna tur kalpui a ni a, naupang talent haichhuahna leh tihhmasawnna kawnga hma lak a nih thu a sawi.
“GSDP report hian a fawmkim hle a, data kimchang tak tak kan neihte hi hma lam kan pan zelna turah a chhenfakawm dawn hle,” a ti bawk.
GDSP hi Mizorama district 11-a training centre 46-ah kalpui a ni a. Sports discipline pakuaah naupang 1,380 an inziak lut a, an zinga 34% chu hmeichhe naupang an ni.
Report-ah hian GSDP kalpui dan bakah thuk zawka zirchianna kimchang, ‘Comprehensive Sports Analytics & Talent Assessment Report’ a tel a. Naupangte bakah training centre leh sports discipline hrang hrangte dinhmun chu tehna mumal tak hmanga zirchiana score pek vek a ni.
GSDP kalpui tur hian January 13, 2015 khan MSSC leh SSM ten inremna an ziak a. Kum 2025-26 chhungin zirlai naupang kum 6–14 inkarte infiamna nihphung leh bulthut inzirtirna a ni a. Kar khatah ni thum aia tlem lo training nei thinin sikul chawlhah uar zawkin kalpui a ni a, naupangten thla ruk chhungin minute 9,000 bawr vel training an nei nia ngaih a ni.
He hunah hian SSM State Project Director C. Lalthanzira pawhin thu sawiin GSDP Programme Coordinator Hmingthansanga’n report khaikhawmna pein zirchianna kimchang tak an neih atangin naupangte zinga infiamna lama theihna a awm dan leh hmasawn zelna tura hmalak a tulnate chiang taka a lan thu a sawi.
GSDP Report tlangzarhna hun hi Henry C. Lalrawnkima, Secretary, MSSC-in a kaihruai a, GSDP Cell leh SSM atangin mi pawimawhte an tel a ni.