Toronto-a street festival hmannaah inkahna thlengin mi pahnih an thi.
Canadian khawpuia police chuan Inrinni zan dar 08:12 (India-a Pathianni zing dar 06:42) vel khan salsa festival hmanna, St Clair Avenue-ah inkahna a awm tih an dawn thu a sawi.
Mi parukin silaia kahna hliam an tuar niin police chuan an sawi a, an zinga pahnih hi a hmuna thi niin an sawi.
Inkahna thlen hnu lawka thuthar lakhawmtute an kawmnaah police chuan festival-a inkahna hi mi pahnih inkarah a nih thu leh silai pahnih hmuh a nih thu a sawi.
Police chuan tumah man an la nei lo va, chhui hna an thawk mek tih a sawi.
Toronto Deputy Police Chief Francisco Barredo chuan inkahna thlen lai hian festival chhimtu mi 13,000 vel an awm niin a sawi.
Police chuan dan bawhchhiatna hmun pathum an thlithlai uluk zual a, thil thar hriat a nih veleh an puan tur thu an sawi.
Mipuite chu a bul vela awm lo turin an ti a, police erawh an tam hle a. He thil thleng hre chiang leh lo hmu an awm a nih chuan an hnena hrilh turin an ngen bawk.
Canadian Prime Minister Mark Carney-a chuan inkahna chuan ‘a barakhaih hle’ a, ‘lusun chhungte leh hliam tuar leh he thilin a nghawngte tan a tawngtai’ tih a sawi.
Ontario Premier Doug Ford-a pawhin ‘engmah ngaihtuah lova tharum thawhna’ chu a dem thu sawiin ‘mi pahnih an thi thu leh mi dangin hliam an tawrh thu’ a sawi.
A hmun thleng hmasa leh lo buaipui hmasate chungah lawm thu a sawi bawk.