Police chuan Naga pawla mi ni ngeia hriatten Inrinni khan Manipur-a Kangpokpi district, Govanjang khuaah mipa kum 53 mi an that tih Pathianni khan an sawi.
Thi hi Haolal Singsit-a, lo neitu a ni a. Inrinni tlai dar 05:30 vel khan Chalvah police station huam chhunga Govanjang khua, Imphal-Tamwonglong (IT) kawngpui bulah a thleng niin police-te chuan an sawi.
Lo neitu hi a nupui nen buh hmuna hna an thawh laiin a chunga pawikhawihna hi a thleng a ni.
Police-te chuan a nupui hi him a tlanchhuak a; mahse, Haolal-a hi silai mu tam taka kah niin a thi niin an sawi.
Police-te hian ruang hi an la chhuak tawh a, Kangpokpi district hospital-ah an dah a. Chhui chian lehzual turin police station-ah thubuai ziah luh a ni tawh bawk.
Officer-te chuan he thil thlengah hian tute nge inhnamhnawih tih hriat chian a la ni lo tih an sawi a, pawikhawihtute man tumin an chhui mek.
Inrinni vek khan khan Kangpokpi district-a Meitei khua, Kanto Sabal-a in paruk haltu nia puh mi pahnih man an ni bawk.
Manipur-ah hian May 13-a inlambunna pahnih thlengah kohhran hruaitu pathum leh Naga pakhat tel an thih hnuah boruak a tang zual hle a. He thil thlen hnu hian Kuki-Zo pawl pawl pakhat chuan Leilon Vaiphei, Kangpokpi district-ah Naga 20 an ru bo va, Naga-ten Senapati district-ah Kuki 28 an ru bo zui ve bawk.
May 15 khan mi 14 ve ve chhuah an ni a. June 9 khan Naga-te hian Kuki kuta la awm Naga parukte nen inthleng nan Kuki 14 dang an chhuah leh a. Heng Naga parukte ruang hi June 10 khan Kangpokpi district-a Leilon Vaiphei bul, Kharam Vaiphei bulah hmuh zui an ni.
Hemi hnu hian Naga pawlte chuan NH-2 (Imphal-Dimapur) national highway leh NH-37 (Imphal-Silchar via Jiribam) chu tiam awm lovin an khar zui nghal a. Kuki pawlte pawhin kawng khar hlih phutin nawrh an huaihawt ve bawk.
Naga paruk thah chungchang an chhuinaah National Investigation Agency (NIA) chuan Manipur Police leh CRPF puihnain a inhnamhnawih nia an puh nupa tuak khat an man tawh.
Chief Minister Yumnam Khemchand chuan NIA thubuai kaihhnawihah Inrinni khan Meitei leh Naga MLA-te nen Makhan khua a tlawh a, a tuar chhungte hmuin he thil thlenga inhnamhnawih nia sawi mi panga an hmuchhuak.
Hming an lo hrilhte an chhui zuinaah rinhlelh mi pahnih man an ni ta a. Chief minister chuan la lohte hi man an nih theih nan sorkar leh dan kengkawhtute mawhphurhna a nih thu sawiin a tul anga thupek pawh tihchhuah a nih tawh thu a sawi.
Manipur-a buaina hi May, 2023 atanga Kuki leh Meitei inkar atanga chhuak niin mi 260 vel thi leh himna zawnga mahni in chhuahsan mi 60,000 vel an awm phah tawh a. Hnam dang pawh a kang kai ta zel a ni.