Health Minister Lalrinpuii chuan Kolkata khawpuiah Mizo damlote pan hlawh tak pahnih, Manipal Hospital, Broadway, Salt Lake leh Kalikata Road-a Kolkata Kidney Institute te tlawhin thawhhona tihchak zel dan tur a sawipui a, West Bengal health minister nen an inkawm bawk.
Health minister hian damdawi in pahnihte hi Inrinni khan a tlawh a. Mizoram sorkar empanelled hospital zinga mi, Manipal Hospital hi Mizoram House, Salt Lake bul maia awm niin Mizoram atanga damlo kalten an pan nasa hle a. Minister hian an hmanraw neihte a enpui Mizo damlote a kan nghal bawk.
Minister hi Kakali Mukherjee, Unit Director leh a team bakah Dr Smartha Pulai leh a team ten an lo dawngsawng a, Mizoram atanga damlo tam zawk an enkawl theih nana hmalakna thar an neihte hrilh fiahin khumin a daih loh avanga day care centre an hawn belha khum 35 chu Mizo damlo tan bika an ruahman thu te an lo hrilh.
Tawnhriat nei Mizo nurse tam zawk chu thawk tura lak belh an duh thu lo sawiin minister chuan August thlaa hna lak buaipuia Mizoram zin turin a sawm.
Manipal Hospital hian India-ah damdawi in 49 neiin a ngah ber leh nei tha ber an ni mek a, panga chu Mizoram Universal Health Care Scheme (MUHCS) zawm an ni.
Kal thlaka tawnhriat nei tha doctor rualin an din, Kolkata Kidney Institute a tlawhnaah minister hi Dr. Pratik Das, Director; Dr. Keshab Sil, Senior Consultant; Dr. Amar Pratap Singh, Consultant Nephrologist leh Chaitali Das Pradhan, Nursing Superintendent ten an lo dawngsawng a, man tlawm zawka kal thlak an kalpui dante an enpui a, Mizoram atanga kal thlak mamawhte tana tangkai taka hman a nih theihna turin inbiak chhunzawm zel nise an ti.
Lalrinpuii hian Zirtawpni khan West Bengal health minister thar, Dr Sharadwat Mukherjee a kawm bawk a, hriselna kawnga India hmarchhak lam state-ten tangruala hmalakho theih dan tur leh minister-te inhmuhkhawm theih dan tur kawng zawn ni se tha an tih thu an sawi dun a. Dr. Mikhuerjee hian an state sorkarin health insurance kalpui a tum thar dan lo hrilhin MUHCS tha a tih thu pawh a lo sawi.
Lalrinpuii chuan West Bengal a sorkar thar lo piangah hnam leh sakhaw zuitu tlem zawkte thlamuang taka an awm theih nana hmala turin a ngen a. A bikin tun hnaia Subhasgram-a Kristian biak in suasam a nih chungchangah pawh hmalakpui turin a ngen bawk.
India chu sakhaw zalenna ram a nih angin khawi state-ah pawh sakhaw hrang hrang betute thlamuang taka an awm theihna turin state tina sorkar hotuten hma an lak tul a tih thu a hrilh bawk.
Health minister hi Zoremthara Ralte, Joint Resident Commissioner; Lalngura Sailo, Assistant Resident Commissioner; Rokhawma Colney, Staff Nurse leh H. Lalhruaitluanga, PS to Minister ten an tawiawm.