US chuan Pathianni tlai khan Iran kap lehin ram pahnihte inkara inkah tawnna a la kal zel a. Iranian sorkar chanchinbu chuan an ram chhimthlang kahnaah hian mi pakhat a thi a, mi paliin hliam an tuar tih a sawi.
US-in a kah leh hnu darkar tam liam lovah Iran-a Islamic Revolutionary Guard Corps (IRGC) chuan Kuwait, Jordan leh Bahrain-a American sipai inbunnate an kap tih an sawi zui.
Inkahna thar awm leh hian June thlaa US-Iran inrem lailawkna an siam chu engtin nge a kal zel dawn tih zawhna a siam nasa a, Strait of Hormuz hawn dan tur pawh ngaihven a ni bawk.
Iran chuan tuikawng pawimawh hi hriattirna thar an siam leh hma loh khar a ni tih a sawi laiin US chuan hawn a ni tih a sawi thung.
Pathianni tlai khan Centcom chuan Iran hi an ram (US) huna tlai dar 05:00 (India-a Thawhtanni zing dar 02:30) atanga an kah tan thu a sawi.
A hnuah air-defence system, tuipui kama radar awmna leh missile leh drone an dahna hmun telin Iranian sipaite hmun tam tak an kah thu a puang zui.
Centcom chuan US sipaite hian ‘Iran-in na takin, rawng takin, vauna leh intihthaihna nen che mah se sumdawng lawngte zalen taka an kal theihna tura che turin a inpeih reng’ tih a sawi bawk.
Centcom-in an kah thu an puan hma lawk hian Iranian sorkar TV chuan Sirik, Qeshm, Bandar Abbas leh Jask-ah te thil puak a awm thu a puang.
“Thawhtanni zinga hmelma, American-te chetna avangin mi pakhat a martar a, mi paliin hliam an tuar,” tiin Khuzestan province deputy governor for security and law enforcement Valiollah Hayati chuan a sawi niin IRNA-in a tar lang.
Thawhtanni khan tuialhthei man pawh Asia-ah a sang leh nghal a. Brent crude chu barrel-ah 4.3%-a sangin $79.26 a ni.
US-in Pathiannia an kah thar leh hma hian Inrinni zan khan Iranian sipai hmun 140 an lo kap tawh bawk tih Centcom chuan a sawi.
IRGC chuan a chhan let nan an chhehvel rama US base leh an thawhpuite awmna chu an bei ve a, boruak a sosang hle.
Iran-in a kah zingah hian April hnu lama a kah tawh loh, inbiaknaa palai, Qatar pawh a tel a. May hnua a kah tawh loh, UAE a tel bawk.