October tawp lamah Mizoram Inchai Title Fight buatsaih a ni dawn a, hemi rual hian wrestling tihhmasawn nan freestyle exhibition inchai vawi 12 chhawpchhuah tel a ni ang.
Thawhtanniah LPS Vision Office, Zarkawt, Aizawlah LPS Director Lalsawmliana Pachuau hovin Mizoram Wresling Association (MWA) hruaitute an inhmu khawm a, October chawlhkar hnuhnung berah zan thum chhung Mizo Inchai Title Fight buatsaih turin ruahmanna an siam a, ngaihven leh ngaihhlut hlawh a nih theih nan mipuiin hmuhnawm an tih theih dan tura chhawpchhuah an tum a ni.
MWA leh LPS thawk dunin Title Fight hnuhnung ber, December, 2024 khan LPS Arena, Falkland-ah an huaihawt tawh a, kuminah thawk dun chhunzawmin a hmun ngaiah bawk an buatsaih leh dawn a. MWA President Ngurthansanga chuan Mizo inchai leh wrestling chawi kan nan leh Mizo thalaite tan mahni insenso huama LPS Vision inepna fakawm a tih thu a sawi a, kum dang zawng aiin Mizo inchai Title Fight-a inlan turte taksa lamah an inpuahchahna a nasain a tha zawk dawn a, hmuhnawm leh ngaihven hlawh tak a nih ngei a beisei a ni.
MWA chuan Mizo Inchai Title Fight hi kum hnih danah buatsaihin mumal zawkin a kalpui chho mek a, ngaihven hlawh ber, Palian champion lai, Lalsangliana’n amah chotu, C Lalremtluanga lakah title humhim a tum dawn a. Sangliana hian kum 2014 khan Lalnunfela kut atangin Mizo infiamna huanga ngaihhlut hlawh title a chhuhsak a, heta tang kum 12 dawn kawnghren a kawl tawh.
Title fight chi hrang paruk a awm dawn a, Palaihawl champion lai, Remruatpuia leh amah chotu, Ramropuia; pate huangah B Lalawmpuia leh Johny Lallawmkima; nulian champion Lalhmangihsangi leh amah chotu, Zodinpuii; nulaihawlah champion lai, Elizabeth Rohlupuii leh Ruthi Lalhruaitluangi; nute champion lai, Lalvenhimi leh amah chotu, C Lalrinfeli an inchai dawn a, zan khatah title fight pahnih zel a awm ang.
Wrestling tilarna leh talent neite tihhmasawn nan zan thum chhungin freestyle inchai 12 zeh tel a ni dawn a, wrestler 24 an inlan ang.
MWA chuan Mizo Inchai Title Fight an huaihawt hmain August 25 atanga 27 chhungin Mamit Multipurpose Hall-ah Inter District Wrestling Championship an buatsaih dawn bawk a, Mizoram chhunga inchai chak zawng zawng tel vek turin an sawm nghal.