India chuan kumin Asian Games khel tur Salima Tete kaihhruai hmeichhe hockey squad puang tawhin mi 20 thlan chhuah zingah Mizo nula pahnih an tel a. Forward Lalremsiami bakah defender Lalthantluangi te India aiawh hian an feh chhuak dawn.
Player 20 awmna squad hian September 19 atanga October 4 thlenga Aichi-Nagoya, Japan-a Asian Games vawi 20-na neih turah gold medal lak theih a, 2028 Los Angeles Olympics khel tura tlin nghal an tum a ni.
Thla hmasaah khan New Zealand-a FIH Nations Cup-ah India hmeichhe team hian no mawi an lo la tawh a, hetiang taka a chet thatpui avangin Tete chu captain a la nih chhunzawm zel phah a ni.
India chief coach Sjoerd Marijne chuan, “Junior, tawn hriat nei tha ve leh senior te inkarah inpawhna tha tak kan nei a, an zavai hian an theihna sang ber chhuah turin an inpui tawn thin a ni,” a ti.
Goalkeeper pahnih atan hian tun hnaia Padma Shri award dawngtu, Savita leh Bichu Devi Kharibam te thlan an ni.
Defence-ah Sushila Chanu Pukhrambam, Ishika Chaudhary leh Jyoti te bakah FIH Nations Cup-a an chet that em vanga senior team lama hmun chang thei, Lalthantluangi leh Shilpi Dabas te an awm ang.
Midfield-ah hian captain Tete bakah Nikki Pradhan, Sakshi Rana, Sunelita Toppo, Neha leh Deepika Soreng ten hna an thawk dawn a ni.
Tlar hmaah Lalremsiami, Rutuja Dadaso Pisal, Navneet Kaur, Deepika, Ishika, Baljeet Kaur leh Beauty Dungdung te an awm bawk.
FIH Nations Cup squad atanga thlak danglam pahnih chauh an awm a, Sonam leh Annu te hmunah striker pahnih, Baljeet Kaur leh Beauty Dungdung te dah luh an ni.
Marijne chuan sawi chhunzawmin, “Heng player rualte hi tun hnaiah an che thain an fit tawk tih an lantir tawh a. Asian Games-a an hmachhawn tur team lian tak tak lakah he team hi an inpeih tawk tih kan chiang a ni,” a ti.