Aizawl: Lunglei District Police Cyber Cell chuan kumin kum chanve, January 1 atanga June 30 inkar chhunga phone bo report an dawn zinga an chhui chhuah 64 chu a neitute kutah an hlan let tawh.
Lunglei District hnuaia Cyber Cell, Lunglei Police Station chuan kumina phone bo report an dawn atangin phone bo 64 chu chhui chhuak tawhin an hmuh chhuahsak veleh a neitute hnenah an hlan let nghal zel a. Phone bo hmuh let zawng zawng hi a hun lai zela a hlut zawng chu Rs. nuai vel a ni.
Lunglei District Superintendent of Police J. Lalmuankima chuan phone bo report an dawnte chu Cyber Cell-in chhu zuiin, an phone hmuh lette a neitute kuta an hlan let nghal bakah phone bo chungchanga dan bawhchhia man chhuahte chu thubuai siamsak thin an nih thu a sawi.
Phone bo a man phu lova hniama lo leisaktute pawh dan anga thubuai siamsak thin an nih thu sawiin phone hlui lei kawngah mi tin fimkhur tur leh hriat chian loh chu lei lo tur te, phone hlui zuar rinhlelhawm an awm chuan police hriattir thuai turin a chah.