Aizawl: Central YMA hruaitute leh Mizoram Journalists’ Association (MJA) chuan Mizoram leh state dang thenkhata Electoral Roll Special Intensive Revision (SIR), 2026 kalpui mek chungchang an sawiho.
Central YMA Hall, Tuikhuahtlanga Thawhlehni chhuna hun hmanah hian Central YMA President R. Lalngheta chuan SIR 2026-ah hian kum 2005 electoral roll-a anmahni emaw, an thlahtute emaw awmte tan chuan harsatna a awm lo tih sawiin dik leh felfai taka inthlun zawm theih a ni a. Chutih laiin 2005 Electoral Roll-a an mahni emaw, an thlahtute awmlo tan erawh chuan SIR 2026 draft roll-ah an awm a nih pawhin endik nawn lehna (hearing) neih huna an lut a nih loh chuan luh mai theih erawh a ni lo tih a sawi.
Central YMA hruaitute chuan tuna SIR hi khua leh tui dik takte chauh electoral roll-a an awm theihna tura thil pawimawh tak a nih rualin tih dik loh palh a nih erawh chuan khua leh tui dik tak ni lote tan awlsam taka electoral roll-a luh theihna a nih avangin fimkhur taka kalpui a tul thu an sawi.
July 4-a draft electoral roll tihchhuah kha ngun taka zir chiangin bial thenkhatah SIR neih hnuhnung ber, kum 2005-a roll-a awm zat leh miring pun dan nena chhutin Enumeration Form thun luh (digitisation)-ah hian thil felhlel leh mihring pun dan a chhutin dik lo a awm nia an hriat bakah mapping chungchangah thil dik hlel a awm nia an hriat avangin hemi chungchang hi thuneitute hnenah en tha leh tura ngenna thlen an tum tih an sawi.