Aizawl: Thawhtanni zan dar 11:00 vel atanga a tuk zing thlenga lei tawlh avangin Tawipui South hmar lamah lei tawlhin in pathum leh dawrte hnawl a, National Highway 54/2 a hnawh ping bawk a. Lunglei District Disaster Management Authority (DDMA) atangin Zonal Officer Grace Lalremdiki Sailo hovin joint inspection team chuan hma lak dan tur an enfiah nghal.
A hmain lei khi nasa tak a awm tawh avangin a chhehvela chengte bungrua hi Thawhtanni khan an thiar chhuak tawh a, a neitute pawh hmun dangah an riak a, hei vang hian mihring thi leh hliam an awm lo.
Lei tawlhin a hnawlte hi F. Lalhredika, Jethra In leh Hmingchhuangi dawr te a ni.
Inspection team-ah hian Geology & Mining (G&M) Department, Lungleia Assistant Controller of Mines Er Lalnunsiama Fanai, ABCI General Manager Akhilesh Singh leh official dangte, Tawipui South Village Council (VC) leh YMA ai awhte, DDMA Quick Response Team (QRT) member-te leh police aiawhte an tel a. A min dan leh min belh thei a la awm leh awm loh te, lirthei kal theiha kawngpui titlang tura hma lak dan turte en hovin leilung a ngheh tawk loh avang leh a la tlak belh reng avangin mihring leh khawl tan him lo thei venthawn thilah leivung paih fai hna chu thawh rih loh mai ni se an ti.
Inspection team hian lei tawlh vanga in leh lo chhiat tawk chhungkuate tlawh nghalin sorkar atanga tanpuina leh chhawmdawlna awm theite ruahmansakin an bawhzui nghal a. Khualzin tangkhangte ei siamsakna leh senso dang phuhruk nan Lunglei DDMA atangin Rs. 20,000 chu Tawipui South VC leh YMA kutah an hlan nghal bawk.
Tawipui South-a lei tawlhin NH 54/2 a hnawh pin hi lirthei kal theiha tihtlang a nih hun tur sawi lawk theih a la nih rih loh avangin Lunglei DDMA hotute chuan khualzinte fimkhur tur leh tul lova hun leh tha sen ral a nih loh nan he lai paltlang tura zin chhuak rih lo turin mipuite an ngen.