Home minister K. Sapdanga chuan ramriah Assam sorkar hotu sangte nen inbiakna a awm leh hnaih a rin thu sawiin, Border out Post (BoP) kawngte siamthat a nih tur thu a sawi a, sorkar pawh a lo inralrin ve a tul hle.
Hun hmasa lamah kan zirlaiten ramriah kut tuarin, silai hial a lo puak tawh a, state pahnih nasa takin kan in bei zui a nih kha. Sorkar thar a lo piang a, kan ram roreltute hian ramri venhim leh kan ram chin humhalh tura an tuang an tihchhah thar a ngai a ni.
Hun a kal zel ang a, kan state thenawmte hian thiam takin kua rawn hreuh chhoh zel pawh an tum ngei ang, mahse kan lo inven a, a do let tura kan lo inhmakhua thiam a ngai tak zet a ni.
Ramri khuate hi ngaihven ila, a theih ang angin mihring dah ila, sorkar hian a khat tawkin chhawmdawl rengin, hmasawnna hnathawh nei deuh reng bawk se, kan ram chin humhalh a tulzia i hre thar zel ang u.
Nakin lawkah chuan min nektute hian min hneh tumin, kawng dang dang pawh an la rawn hmang ngei ang, mahse kan thisenin a ngam a, kan ram chin kan humhalh sauh sauh zel a tul a, sorkar pawhin kan ram chin a humhalh a, eng level-a inbiakna pawh nise hnungtawlh lo tura an lo inruahman ve reng pawh a tul e.