Assam-a fur tui lian thawh khatna thleng mek chu a nasa tial tial a, mi pali thi an awm tawh.
Tui lian hian mi 35,000 chuang tibuai mekin an thenawm, Arunachal Pradesh-a ruah a sur chhunzawm zel chuan an pung thei dawn niin a lang.
Thi awm thar ber hi Sonitpur district-a Charidur revenue circle-a mi a ni a. Thawhtanni zan atang khan a chin hriat loh niin Thawhlehni khan a ruang hmuh zui a ni.
Assam State Disaster Management Authority (ASDMA) hotu sang pakhat chuan, “Tui lian vang hian mi 37,032 an buai mek a, Lakhimpur chu a tuar na ber niin mi 35,696-in an tuar mek a ni,” tiin a sawi.
Tui hi district paruk – Sonitpur, Dibrugarh, Lakhimpur, Dhemaji, Jorhat leh Sivasagar lianin revenue circle 12 leh khaw 99 a tibuai mek.
“Relief distribution centre 20 siam atangin a tuartute chhawmdawlna thil hrang hrangte chu sem chhuah mek zel a ni,” a ti.
Darkar 24 liam ta chhungin State Disaster Response Force (SDRF) chuan Sonitpur district-ah mi 16 an chhan chhuah belh leh bawk.
“Tui lian hian thlai chinna hmun ram hectare 1,103.94 a chim a, rannung pahnih leh bo tawhin ar telin ran 16,139-in an tuar mek a ni,” tiin ASDMA hotu chuan a sawi.