US President Donald Trump-a chuan Iran-in indawr chhunzawmna lam an hawi a nih loh chuan kar tharah an lei leh power plant-te beihah a vau.
Fox News-a an kawmnaa hei hi a sawi mek laiin ram pahnihte hi ni li a zawnin an inkap tawn ta bawk.
Trump-a hian a hmain Strait of Hormuz kaltlang bungraw phur lawngte hnenah kal man 20% lak a tumna chu a thulh a, Iranian lawng chawlhna dan a tum erawh a kaltlangpui.
“Kar tharah hian chhe lehzual an tawng dawn,” a ti a. “Dawhkan kila inbiakna a awm lo a nih chuan an power plant zawng zawng kan chhu chhia ang a, an leite kan tichhe vek dawn a ni,” a ti.
April thla khan Trump-a hian lei leh power plant telin Iran-a civil mite thil pawimawi bomb-ah a lo vau tawh bawk.
Hetih hun lai hian UN human rights chief Volker Türk-a chuan, “Khawvel dan angin civil mite leh an thil beih hi indonaa dan bawhchhiatna a ni,” a tihsak a. Hei hi 1949 Geneva Conventions-in a duan a ni.
“Energy hmunte beih hi ka dah hnuhnun ber a ni a; mahse, tunah chuan kan bitum dawn a ni,” tiin Trump-a hian Thawhlehni zana tihchhuah, Special Report with Bret Baier-ah a sawi a ni.
US palaiten Thawhlehni zan khan Iranian aiawhte dawrin ‘inremna tha zawk siam a nih loh chuan engmah chan in nei dawn lo’ tiin a sawi a ni.
President-in a vau mek lai hian US sipaite chuan darkar sarih chhung Iran kapin an lawng chawlhna an dansak bawk.
US Central Command (Centcom) chuan Strait of Hormuz bula Iranian sipai hmun ‘tam tak’ an bitum thu sawiin an tum chu ‘Iran-in sumdawng leh a thawk civil mite tana hlauhawm an siam theihna tihchhiat’ a ni tih a sawi.
Hetih lai hian Tehran pawhin missile leh drone hmangin Jordan, Kuwait leh Bahrain-a US hmunte an kap ve reng tih Iranian sorkar television IRIB chuan a tar lang.
Nilaini khaw var hma khan Kuwait-a sipaite chuan Iranian attack drone an lo kap thla a, Bahrain pawhin air raid siren an tiri bawk.
“Kuwaiti air defence-ten Iranian beihna hlauhawm tak takte an lo dang,” tiin Kuwaiti army chuan a sawi a. Bahrain-a interior ministry chuan an khua leh tui leh mi chengte chu chiai lo tur leh an hnaiha hmun him pan thuai turin an ti.
US leh Iran inkap thar leh avang hian Strait-a lawng kal a theih loh avangin khawvel pumah tuialhthei man a tisang leh mek.
US hian Iranian lawng chawlhna zawng zawng hi April thla khan Tehran nawr nan a lo dang tawh a. Chawlhkar nga dawn chhungin US sipaite chuan sumdawng lawng 100 vel kawng zawh thlaktirin lawng pali an tichhe bawk.
June thlaa inremna a awm theih nana memorandum of understanding an ziah hnuah hawn a ni a; mahse, tuikawng pawimawh hi ram pahnihte inkara boruak siamtu ber a la ni zel.