Zee Entertainment Enterprises sawi danin FIFA World Cup 2026-a fakna chhuah duhtu an thahnem hle a, knockout stage chhungin second 10 chhung fakna chhuah man chu linear (TV pangngai) leh digital platform-ah Rs. nuai 20 atanga 25 a tling phak a. Digital platform-a fakna tihchhuah man hi TV pangngaia chhuah aiin a to zawk a ni.
Quarter finals khelh chinah Zee chuan an digital platform ‘Zee5’ leh an sports channel-a FIFA World Cup 2026 fakna hmun ruak 95% aia tam chu fakna chhuah duhtute hian an hauh lawk vek tawh tih an sawi a ni.
He thil chungchanga fakna an lak hnem dan chungchang sawiin Zee Entertainment Chief Operating Officer, Advertisement Revenue, Sandeep Mehrotra chuan, “Fakna chhuah duhtute min chhanna hian kan beisei a khum chiang hle a. Fakna chhuahtuten kan chungah rinna thuk tak an nghat tih kan hmuh hian infiamna huang rintlak leh danglam bik din kan tumna thlirna zau zawk chu a nem nghet,” a ti.
Tun thlengin World Cup khelh laia fakna tihchhuah tur hian brand 22 aia tam – automotive (lirthei), technology, beverage, FMCG (ni tin mamawh chi), healthcare (hriselna), sportswear & lifestyle, fashion, e-commerce, financial service (sum leh pai lampang), travel & hospitality (zin hruaina leh khualbuk), real estate (in leh lo), paint (rawng), oil & energy leh education (zirna) huang chhunga mi te chuan Zee hi thawhpuiah an thlang a ni.
Fakna chhuahtuten an ngaihven bakah Zee chuan TV, digital leh social media hrang hrangah entu leh tuipuitu an tam hle tih an sawi a. FIFA nen inremna an siam hnuah Zee chuan Bundesliga leh khawvel huap cricket match chhuahna hmun te thlengin an sports huang an tizau zui bawk.
Thil thlen dan tur chhut lawkna chung chang zawh a nihin Brand Finance India Director, Ajimon Francis chuan tun hi fakna tam zawk a luh hun tak a nih thu a sawi a. Karleh velah phei chuan a man hi a san chhoh deuh deuh a rin thu a sawi bawk a. Fakna chhuah duhtute phurna chu Round of 32 leh Round of 16 an thlen chhoh khan a sosang tak tak tawh niin a sawi.
Francis chuan, “Fakna chhuahtute tan chuan en fiahna leh chhutna neih hi a pawimawh hle a. FIFA World Cup entu an pun rual hian chhun lama match highlights thlirtu an tam bawk si a, hei hian fakna chhuahtu team te tan an sum sen zat bakah an hmuh let leh zat chhut chianna tha tak a siam a ni,” a ti.