Aizawl khawpui chhung hmun thenkhatah lung tla mai thei a awm avangin district bawrhsap chuan thuchhuah a siam a, a hnuaia kalte himna tur ngaihtuahin ruahmanna hrang hrang an siam bawk.
Ruahtui a tlak laiin heng hmunte hi a hlauhawm zual a, kea kal leh lirtheia tlante tan pawh a hlauhawm dan a nep chuang lo.
Fur khua kan lut a, chhiatna hrang hrang thlen duh hun a nih avangin mitin kan fimkhur a tul a, lung tla thei hmuna sawite phei chu a theih hram chuan kan hel zel pawh a tha hle.
Chhiatna a thlenin a pawi tur angin a lo pawi zo tawh thin a, chuvang chuan a ngaihtuahtu hotu sangten ngaihtuahna senga kan himna tur an siam hi zawm hram ila, a theih hram chuan kawng danga tlan hram hram zel kan tum rih pawh a tha awm e.
Chhhiatna a thlenin puh tur leh sel tur kan zawng ruai tawh thin a, inhmakhua theih hun lai hian kan lo inhmakhua thiam a, ruahtui tlak lai phei chuan a bulhnaia kan tlan loh rih pawh a tul hle.
Harsatna hrang hrang thleng thei lakah mitin fimkhur ila, fur ruahtui tlak tam hun lai hi chhiatna thlen duh hun, lei leh lung nem hun a nih avangin kan him tlan zawk nan thuneitute ruahmanna siam hi hrerenga, zawmin, a theih hram chuan pawn chhuak tam lo turin i inveng theuh ang u.