Aizawl: Local Administration Department (LAD) leh District Panchayat Resource Centre (DPRC) tangkawp buatsaihin, Rashtriya Gram Swaraj Abhiyan (RGSA) hnuaia ‘Exposure Visit Within State Programme’ chu Nilaini atang khan Kolasib district-a Kawnpui Village Council III-ah tan a ni a, Ningani nen hian hun hman a ni ang.
Tanna hunah hian H. Lalfakzuala, Kawnpui VC III president chuan kalkhawmte lawmna thu sawiin an VC-te hian tual chhung rorelna tha kalpui dan te, khawtlang hmasawnnaah mipuite tel vena a pawimawhzia leh RGSA hnuaia khawtlang hmasawnna hmanraw pawimawhte chungchangah zirtirna an pe a ni.
Exposure Visit Programme-ah hian Kawnpui VC III-ten Panchayat Advancement Index (PAI) 2.0 Score tha tak an hmuhna, Local Sustainable Development Goals (LSDG) Theme 2 (Healthy Village) leh Theme 9 (Women Friendly Village) chungchanga hma an lak dante chu zirho a ni ang.
Heng bakah hian khawtlang inrelbawlna atana anmahni puala sum an tuak chhuah dan tha an neihte chu a hmuna tlawha zirho tura ruahman a ni.
A ni khatna vawiin hun hmannaah hian LSDG Theme 9 – ‘Women Friendly Village’ chungchang hi L.R. Lalrinmawia Hnamte, Head Faculty, DPRC, Kolasib-in a sawi fiah a. Chawhnuah a telten Kawnpui VC III-ten sum tuak nan leh khawtlang mamawh phuhruk nana mipui dawr 12 an siam te, clinic centre leh bazar hmunte an tlawh nghal a. VC hi Kolasib district tih loh zawng district hrang hrang (MADC and LADC, CADC telin) atangin mi 40 an tel a ni.