Aizawl: Khatla North Presbyterian Kohhran Hall-ah Mizo Hmeichhe Tangrual (MHT) chuan an pawl din champha, kum 80 (Oak Jubilee) tlin lawmna inkhawm an hmang a. Health & Family Welfare leh Social Welfare Department Minister Lalrinpuii’n a hmanpui.
Khuallian chuan MHT-in kum 80 an tling ta chu lawmpuina chibai a buk a. Hmanlai Mizo society hnufum tak, hmeichhiaten rorelna leh thutlukna siam kawnga chanvo an neih tlem laia hetiang pawl a ding thei leh hruaitu hmasate inpekna chu ropui a tih thu a sawi a. Ram buai leh hun harsa lai pawha Motherless Babies’ Home hial an lo din theite chu fakawm a tih thu a sawi bawk.
Minister chuan kum 2023 MLA inthlanpuiah hmeichhia pathum lai thlan tlin an nih thu leh cabinet minister meuh pawh an awm ve theih tak thu sawiin Mizo hmeichhiaten hma an sawn zel chu lawmawm a tih thu a sawi a. “A chak apiang leh a fing apiang hi an ding chhuak lo a, an hun tawna danglamna thleng mil zela inher rem thiam apiang an dingchhuak thin,” tiin Mizo hmeichhiate chu hun danglam zel mila inher rem thiam turin a chah a. Ruihhlo, HIV/AIDS, cancer leh nupa inthenna hluar te chu Mizo society-in a hmachhawn mek an nih avangin, heng laka kan ram vawnghim tur hian hmeichhiaten mawhphurhna sang tak an neih thu a sawi bawk.