Aizawl: Food, Civil Supplies & Consumer Affairs Minister B. Lalchhanzova hovin Ningani khan NABARD, Mizoram Regional Office-in a din champha 45-na ‘Foundation Day’ chu Conference Hall, NABARD RO MINECO, Khatla, Aizawl-ah hman a ni.
Minister chuan kuthnathawkte hmasawnna kawngah NABARD chuan a thawk tha hle nia a hriat thu a sawi a. CODNERC chairman a nih chhunga Thenzawl Handloom Cluster Project sanction hmanga Mizoram handloom sector chawilar a nih dan te a sawi a. NABARD chuan rural development atana hma an lak danah tualchhung/khawtlang boruak mil zelin leh mipui mamawh ang zela hma la zui zel turin a chah.
Foundation Day lawmnaah hian Bhaskar Manta, General Manager (OIC), NABARD chuan kalkhawmte lawmna thu a sawi a. Mizorama NABARD hmasawnna tura hmalakna leh hlawhtlinna hrang hrangte tar langin state chhunga institution hmalakna hrang hrangte Lalrokunga Chhakchhuak, DGM, NABARD-in a tar lang bawk.
‘Women-Led Development in Agriculture in Mizoram’ (hmeichhe kaihhruai agriculture hmasawnna) tih thupui hmangin Prof. Lalhriatpuii, Department of Economics, Mizoram University-in presentation a pe bawk.
T. Lhungdim, General Manager, RBI te, Mizoram Rural Bank-a Chairperson Sheryl L. Vanchhong leh A. Lallungmuana, CEO, Mizoram Cooperative Apex Bank (MCAB) ten thu an sawi.
NABARD hi agriculture leh thingtlang hmasawnna atana development financial institution sang ber atana kum 1982 khan din a ni.