Aizawl: Mizoram Gorkha Youth Association (Central)-in an pawl kum 50 tlin lawmna kal zelah Inrinni khan Aizawl veng 12 leh district khawpui pathum bakah Vairengteah te faina beihpui hnatlang an huaihawt.
Heng hnatlangah hian MGYA member 600 chuang an thawk chhuak a. Aizawl khawpui chhunga MGYA branch 12 te chuan Aizawl Zotlang-Vaivakawn kawng dung, Jail Veng-Vanapa Hall kawng dung, Bawngkawn Main Road, Bawngkawn to Durtlang Raod, Dinthar-Vaivakawn Road leh kawngdung dang 10 chuangah bawlhhlawh te thianfaiin kawngdung te tifai a. Lunglei, Siaha, Kolasib, Bualpui leh Vairengte a MGYA Branch te pawhin an khawpuiah theuh faina beihpui hnatlang an nei bawk.
MGYA hi Mizorama Gorkha te pawl lian ber niin kum 1976-ah khan din a ni, member 5,000 vel an awm mek a. August ni 18 khian Golden Jubilee lawmna buatsaih an tum a, Inrinnia faina hnatlang hi he an kum 50 tlin Jubilee kum lawmna peng pakhat a ni.