Aizawl: Tourism Minister Lalnghinglova Hmar chuan Mizoramin tourism-ah theihna sang tak a neih thu sawiin, hmarchhak-a event management lama mi lian kalkhawmte chu an event neihte Mizorama nghat thin turin a sawm.
Guwahari-a Mayfair Spring Valley Resort-ah Inrinni chawhnu khan India hmarchhak state-te event, tourism, hospitality leh entertainment industry-a an hmasawnna tur ngaihtuahna inkhawmpui, ‘Imaginarium 2.0 – North East Events & Entertainment Leaders’ Summit’ chu hawn a ni a, he hun hi Mizoram tourism minister hian a hmanpui.
Summit hawnnaah hian Tourism minister chuan Mizoramin tourism-ah theihna sang tak a neih thin thu sawiin, tunah chuan a taka chantir a hun tawh tih a sawi a, event management lama mi lian kalkhawmte chu an event neihte Mizoram tlang leh ruam mawi, lui leh boruak thiang takah rawn nghat thin turin a sawm.
Minister chuan Mizoram chu hmun kilkhawr a ni tawh lo tih sawiin, tunah chuan rel a luh tawh avangin awlsam leh tlawm zawkin a zin zung zung theih tawh a, thlawhna phei chuan India ram hmun hrang hrang atangin darkar rei lo te chhungin a thlen zung zung theih tawh thu a sawi a; event tourism hi a thlengtu tan a hlawk a, eizawnna tam tak siam theitu a nih avangin Mizoram pawhin nasa lehzualin tan a la dawn tih a sawi bawk.
He hunah hian Mizoramin tourism event leh festival lian thleng tura theihna a neih ziate leh sorkar hmalakna hrang hrangte chu Mizoram Tourism Department leh I&PR Department te tangkawp siam video presentation hmangin enho a ni a, he video-ah hian Mizoram tlawh chhan tur hrang hrangte tar lan a ni.
Pathianni thleng he Imaginarium 2.0 summit hi neih a ni a, India rama event leh entertainment industry-a mi pawimawh tak tak ten India hmarchhak state-te hmasawn dan tur an sawiho chhunzawm a ni.