Aizawl: July 6 leh 9-a ruah tlak tam avanga lei leh lung tlain a hnawh pin, Aizawl chhim lam kawng pawimawh, Kulikawn leh Ngaizel inkar kawngpui chu Public Works Department (PWD) leh Kulikawn tual chhung mi hnatlangten chhun leh zan zawma an thawh hnuah lirthei kaltlang theih turin thenfai a ni ta.
He lai hmun hi Aizawl lut leh chhuak tam tak tlan tlangna kawng a nih avangin kawng ping hian mipui veivahnaah harsatna lian tak a thlen a, PWD leh tual chhung mite hnatlangte hmalakna zarah lirthei eng chi pawh ‘one-way’-a tlan zui theih turin a tlang zui ta a ni.
Kawng hi tlang tawh mah se khaw chin a la that tawk loh avangin Kulikawn Local Council hotute chuan Ngaizel kawng phei zawhtu lirthei khalhtute leh kea kal mipuite chu fimkhur turin an chah a, kawng dinhmun thlir chungin a tul anga hmalak chhunzawm zel an tum thu thuchhuah siamin an tar lang.
He kawng a tlang takah hian Aizawl City Bus Owners’ Association (ACBOA) hotute pawhin dinhmun thlirin city bus-te chu a hmaa an chhuahna hmun thin, K. Lalnghakliana Petrol Pump bul atanga service leh thuai tura hmalak an tum thu an sawi bawk.