Aizawl: Tourism Minister Lalnghinglova Hmar chuan Assam Tourism Minister Ajanta Neog chu Inrinni khan kawmin tourism hmasawnna kawnga state pahnih sorkar thawhho dan tur a sawipui.
Assam tourism minister chenna ina an inkawmnaah hian Lalnghinglova Hmar chuan Mizoramin nikum September thla atanga rel connectivity a neih hnuah nasa takin khualzin an pung tih a sawi a. Mizoram tlawhtu tam zawk chu Assam atanga kal an ni a. Chu chuan tourism kaihhnawihah state pahnihte inkara thawhhona tha zawk neih a tulzia a tilang a, thawhhona nghet zawk an neih chhoh ngei a beisei tih a sawi.
Neog-i pawhin Mizoram nena thawhona tha neih chu an duhthusam a nih thu leh state pahnih tana thil lawmawm a nih thu a sawi ve bawk.
State pahnih minister-te hian department kaltlanga thawhhona mumal zawk neih tha an ti a. India-a lang tham tourism-a hmasawnna chak leh langsar nei tur chuan Assam leh Mizoram mai bakah hmarchhak state-te thawhho tlan a pawimawhzia an sawi dun.
Lalnghinglova Hmar hian Mizoram sorkarin kumin chhunga tourism event leh festival hmachhawp a neihte Assam minister chu hrilhin, Mizoram tlawha festival-te hmanpui turin a sawm a. Neog-i pawhin zin ngei a tum thu a lo hrilh a ni.