Andy Burnham chu kum 10 chhunga Britain prime minister turin tihchian a ni ta a, an rama vantlangin harsatna an neih, a bikin khawsak man to leh service hrang hrang an neih tha tawk lo te ‘tihthat’ a tiam.
Keir Starmer-a chuan Thawhtannia 10 Downing Street-a inthlahna thu a sawi zawhah tih dan pangngaiin King Charles-a hnenah a bânna a thehlut zui a, monarch hian Burnham-a chu prime minister thar turin a sawm zui a ni.
Hemi hnuah hian kum 56 mi, Greater Manchester mayor, ‘King of the North’ an tih tan hna hautak a intan dawn a ni.
A cabinet turte chu rorel lai, Labour Party chhungah inhnialna a awm nghal mek a, a ruat fel hnuah a hniam ber atanga an eibar thang muang lutuk tihziaawmna tur thlengin hna thawh tur an nei dawn a ni.
A pisa chuan Burnham-a hian ram hruai a tum dan a puang thuai dawn a, ‘nghet leh mawh la ngam sorkar’ din a tum tih an sawi.
Britain-a chona lian tak tak hmachhawn tur a awm laia prime minister a ni tur chu chawimawina tling nia a hriat thu sawiin politic ngialnghet chauhvin hmasawnna a thlen thei tih a sawi.
Zirtawpnia Labour hruaitu atana thlan a nih khan Burnham-a hian ‘kan politic kum 40 chhunga thil inthlak pawimawh ber’ tiin a sawi.
Politic kalphung chu thlaka khawsak tihsanna tur leh an ramin a mamawh ‘khawsak nuam leh mi tin leh hmun tin tuna an awmna mek atanga chawikang tura rang taka taka hmalak’ a tiam.
Prime minister thar tana chona lian hmasa ber chu cabinet team din a ni a, a bikin finance minister tur a harsa zual a. A thawhpuite zingah inpawhna a awm a, hei hi a hmaa sorkar pawt hniamtu laimu pawh a ni.
Energy Security & Net Zero Minister Ed Miliband-a nen an inbe tawh a, ani bakah Interior Minister Shabana Mahmood-i chu finance chang tura rinkai an ni.
Burnham-a chuan Zirtawpni khan an party chu ‘thu leng vel’ engah mah lo ngai lo tur leh a team tur a la tihfel loh thu a sawi.
Chona lian dang leh chu chhiah lak leh hmanna, tuialhthei leh boruakalhthei, utility company-te chungchang te pawh a ni dawn a. Hengte hi Burnham-a hian vantlangin tam zawk an thunun a duh a ni.