Aizawl: Cooperation Department Minister P.C. Vanlalruata chuan Salvation Army Hall, Zemabawk Venglaiah Mizoram Co-operative Apex Bank Ltd. Branch 37-na (Zemabawk Branch) chu Thawhtanni khan khuallian niin a hawng.
P.C. Vanlalruata chuan Aizawl Municipal area chhunga veng lian ber pawl leh a veng chhung laili bera Apex Bank branch thar hawn a ni thei chu lawmawm a tih thu a sawi a. Apex Bank chu sorkar policy hrang hrang leh hmalakna tihhlawhtlin kawnga thawhhlawk tak an nih thu sawiin, sorkar Zau Policy-te pawh society-ten a tangkai thei ang bera hmang turin a chah a. Mizo bank a nih angin mipuite leh sorkar nen thawhhona tha tak nei chhunzawm zel turin a sawm bawk.
Apex Bank Chairman, Lalnunsanga pawhin hlawkna (profit) chauh um lovin thingtlang leh bank mamawhna hmunah an inzarpharh zel tih sawiin, July 14, 2026 khan Saipum, Kolasib District-ah branch hawn a lo ni tawh tih a sawi a. Zemabawk Local Council Chairman Zosangliana pawhin branch thar chu Zemabawk leh a chhehvel tana hmasawnna ngelnghet a nih ngei a beisei thu a sawi.
Hawnna inkhawm hi Apex Bank Chairman Lalnunsanga’n a kaihruai a, Deputy General Manager Vanlalhriata’n Apex Bank-in tunah hian Branch 37 leh ATM 45 an enkawl mek thu a sawi.