Nimin khan Zarkawt Community Hall-ah Zirsangkima lehkhabu thar ‘Zirtu Zir Lai’ tih chu Lalnunpuia Hrahsel in a tlangzarh a, Lalvansanga Pautu, The Zozam Times chuan lehkhabu thlirlawkna a nei.
Tlangzarhtu Lalnunpuia Hrahsel chuan lehkhabu thar chu birthday lawmna thilpek atan pawha inpek chi, naupang zawng zawng bakah, thalai zawkte tan pawh chhiar chi a nih thu sawiin, hetiang ziak thei an awm hi Mizote vanneihna a nih bakah, mi zawng zawng chhiar theih a nih avangin a hlu hle a ti.
Lehkhabu thlirlawktu chuan Zira’n so bawrh bawrh chunga lehkhabu a ziah chu kan hnam tan a ni a, kan hnam tana chanchintha min hnutchhiah chu chhiar tam a ni, chumi tur chuan a thawhhlawk hle a ti bawk.
‘Zirtu Zir Lai’ chu mitin mil a nih avangin naupang zawkte tana ni kher lo, puitling tawh leh sakhaw rawngbawltute zawng zawng tana chhiar ngei chi niin a sawi bawk a ni.
‘Zirtu Zir Lai’ tlangzarh rual hian kum 2013-a tihchhuah tawh Zirsangkima lehkhabu ‘Ramada 19’ chu tlangzarh nawn lehna nei bawkin, Novelist lar C. Lalnunchanga chuan a tlangzarh.
Dr. H. Laldinmawia, HoD, Dept. of Mizo, PUC chuan thlir nawnna neiin, Dr. Dorothy Zonunsangi, Asso. Prof., Dept. of English, Govt. T. Romana College leh R. Lalfakzuali, Mizo & Culture Studies, ICFAI University chuan lehkhabu chungchanga thlirna hrang hrang an nei bawk.
Zirsangkima lehkhabu pahnih tlangzarhna hun hi Lalrammawia Ngente, HoD Dept of Mizo, Govt. Johnson College chuan a kaihruai a ni.