Aizawl: Aizawl Municipal Corporation (AMC) bultumin lei laih dilna buaipuitu engineer leh geologist-te tan ‘Sensitization Programme for Technical Personnel under the AMC Site Development and Slope Modifications (SD&SM) Regulations, 2017’ chu Thawhlehni khan AMC Auditorium-ah neih a ni a. He hunah hian geologist 80, engineer 224, soil engineer panga leh firm aiawh mi pasarih an tel.
Programme hi Lalremruata Kullai, Joint Municipal Commissioner-an a kaihruai a. Executive Corporator i/c SD&SM Vanlalhruaia’n hawnna thu sawiin, Aizawl himna leh hmasawnna atangin technical personnel-te tan ho puiah a sawm.
Khuallian Aizawl Mayor H. Lalremtluanga chuan Aizawl khawpui him leh tlo zawka a puitlin zel nan thil awlsam duh vanga dan palzut lo tur leh, rawngbawlna rilru pu chunga mahni thiamna leh finnate mipuite tana hmang tangkai turin kalkhawmte a fuih.
He hunah hian AMC Assistant Engineer Lalnunmawia leh Consultant Geologist Jessy J. Laltlanzauva ten SD&SM Regulations leh lei laih dil dan chungchangah zirtirna an pe a, Geologic Review Board member Lalbiakkima’n hriat tur pawimawh hrang hrang a tar lang bawk.
Zirtirna pek hnu hian report thehluh dan leh regulation chungchanga thil pawimawhte sawiho a ni.