Aizawl: Ram pum huapin Foreign Contribution (Regulation) Amendment (FCRA) Bill chungchanga inrawnkhawmna, he dan tihdanglam tumna hi hnam tenau leh sakhaw tenau zawkte chimralna atana BJP sorkar hmanrua a ni tiin an sawisel.
Delhi-a India International Centre-ah Joint Action Forum on Minorities (JAFM) huaihawtin, Thawhlehni khan ‘National Consultation on the Proposed Foreign Contribution (Regulation) Amendment Bill 2026’ tih thupui hmangin rampum huap inrawnkhawmna vawi khatna neih a ni.
Inrawnkhawmna JAFM chairman, DMK MP P. Wilson kaihhruaiah hian thu sawitute chuan sorkarin FCRA tihdanglam a tum dan chu tum bik nei sa leh hawi lam nei sa a ni tiin, he dan thar hian India-ah kawng hrang hrangin harsatna nasa tak a thlen dawn thu an sawi a. A bikin tihdam hna thawktute, zirna inte, hnuchham leh phar enkawltu tlawmngai pawlte, thingtlang lo neitute leh mi rethei zawkte harsatna an tawk dawn tih tar lang.
Kalkhawmte chuan he dan tihdanglam tumna hi hnam tenau leh sakhaw tenau zawkte chimralna atana BJP sorkar hmanrua a ni tiin an sawisel a. Tun dinhmunah FCRA chungchanga harsatna a thlen loh nan Pathian kuta tluk luh a pawimawh thu leh, ram hruaitu BJP party hotute tana nasa lehzuala tawngtaipui turin mipui an ngen nghal bawk.
He inrawnkhawmnaah hian MP 20 leh kohhran hruaitute an tel a. Ram hruaitute zingah National Conference President Dr. Farooq Abdullah, DMK MP Kanimozhi Karunanidhi leh A. Raja, AAP MP Sanjay Singh leh Meghalaya MP Saleng A. Sangma te an tel.
Kohhran leh tlawmngai pawl aiawh zingah CNI (Delhi Diocese) Bishop Rt. Rev. Paul Swarup, Mar Thoma Syrian Church Bishop Mar Aprem, Catholic Bishops Conference of India (CBCI) atangin Fr. Christu Rajamony, United Christian Forum President Michael Williams, National Council on Compensation Insurance (NCCI) General Secretary Rev. Asir Ebenezer, All India Sunday School Association (AISSA) President Rochamliana, North East India Christian Council (NEICC) General Secretary Rev. Meyu Changkiri leh Council of Baptist Churches in Northeast India (CBCNEI) Secretary General Namseng R. Marak te an tel bawk.