Arsenal chuan ‘lehlam goal nawrnaa kawng hrang hranga hman theih,’ Christos Tzolis chu Club Brugge atangin £ maktaduai 34-in an la lut.
Kum 24 mi, Greece international hian Premier League champion hi ‘hun rei tak daih contract ziakin a zawm’ tih puan a ni.
Tzolis-a hian Club Brugge tan vawi 108 a khelhah goal 43 a thun a, a thiante thun tur vawi 45 a siamsak bawk.
Arsenal hi Belgium forward Leandro Trossard-a’n Besiktas pana tun thla tira a chhuahsan hnuah a zawm a ni.
“Christos-a hi a khelh dan pangngai berah chuan vei lama awm thei a ni a; mahse, tlarhma khawi laiah pawh hman theih vek a ni,” tiin Arsenal sporting director Andrea Berta chuan a sawi.
“A ke pahnih hniha goal thun thei a ni a, hmun chepa chet lak dan a thiam a, ball a chang nghet thei em em bawk,” a ti.
“Christos-a hian season thum liam ta chhung khan goal thun leh mi dang tana thawh chhuahah hnuhma lian tak a nei a, khelh dan phunga kan squad tichaktu tur a ni dawn a. Kan team-a energy, phurhna leh rilru lam thlenga thathona leh chakna min petu tur a ni,” a ti bawk.
Tzolis-a hian PAOK-ah a football nun bul tanin kum 2021 leh 2024 inkar khan Norwich tan khelin vawi 30 a feh chhuak hman a, goal thum a lo thun tawh bawk.
Norwich tan hian a khelh lai hian Twente leh Fortuna Dusseldorf-ah loan-a tum hnih khel chhuakin Club Brugge-ah a nghetin a lut zui ta a ni.
Tzolis-a hian Premier League-ah Canaries tan inlan hmasa berin September, 2021 khan Arsenal lakah 1-0-in an tlawm a. Tuna a zawm takah hian Arsenal boss Mikel Arteta nen ‘inkawmna tha tak’ an nei tih a sawi.
“Thil chi hrang hrang – club chungchang te, keima chungchang te, a ruahmanna neih te, team chungchang leh tha ka thawh ve theih dan turte kan sawi dun a ni,” a ti.
“A lawmawm lam thil tam tak a awm a. Kei hi chu goal bawh chi ka ni a, goal thun leh mi siamsak tura khel chi ka ni a. Hei hi lehlam goal nawrtu, winger ka nihna anga ka thlir dan a ni,” a ti.
“Goal thun emaw, ka khelhpuite thun tura siamsak hi ka châk em em reng a. Team tan rim takin ka thawk thin tih ka sawi ngam a, tlarhnung venah pawh ka pui thei bawk a ni,” a ti.