Aizawl: NEET-UG zawhna paper put ru chungchang duh lohna lantirin Ningani khan Mizo Zirlai Pawl (MZP) chuan Vana Pa Hall tualah Peaceful Protest an nei a; he hunah hian MZP chuan resolution paruk an pawm.
Peaceful Protest an neihna hunah hian MZP president C Lalremruata chuan, kumin NEET-UG exam zawhna putru avang hian Mizo zirlai 2,000 velin an tawrh thu leh pawi an tih thu a sawi a; he thil thleng hi a demawm takzet thu leh NEET-UG paper putru duh lohna lantira hmalakna hrang hrangte chu an thlawp tlat thu a sawi.
MZP hian resolution paruk an pawm a, heng an resolution te hi sorkar laipui beng a thlen ngei theih nan hmalak a nih dawn thu an sawi a; punkhawm an huaihawt zawhah an resolution hi Larsap hnenah an thehlut a ni.
Ningani vek khan district khawpui tinah MZP Headquarters hrang hrang chuan Peaceful Protest hi an huaihawt bawk a, Lunglei MZP Hqtrs. chuan kawngzawh huaihawtin, Old Tennis Court ah hun tawi an hmang a. Kawngzawhnaah hian NEET paper zawhna putru a mawhphurtu hrem ni se an duh tih an sawi a. DC office tualah central a thleng tur resolution an pawm an thehlut a, DC aiawh hian Lalruatfela, SDC chuan a lo dawng a ni.
Serchhip-ah pawh MZP Hqrs te bultumin, Serchhip Bazar kawnah punkhawm neih a ni a. Serchhipa zirna in hrang hranga zirlai thahnemtak tak an pungkhawm a. He hunah hian Darchhawna, President, MZP Hqrs Serchhipin kaihruaiin, Serchhip Dist. MJA President leh MZP Serchhip Hqrs Adviser ni bawk Kapliana Pachuau chuan thu a sawi.
- Resolution paruk pass
- NEET (UG) 2026 Exam-a question leak out hi kan dem tak zet a, a thlen nawn tawhloh nan central sorkarin hma la nghal rawh se.
- NEET Question leak out avanga kan zirlaipui nunna chan ta te hi kan tawrhpui takzet a, sorkarin zangnadawmna pe ngei rawh se.
- Exam dan kalphung langtlang leh tha zawk kan neih theih nan National Testing Agency (NTA) siam that ni rawh se.
- He thil thleng avanga peaceful protester te chunga police-te tharum thawhna thleng hi kan dem takzet a, democracy ramah hetiang hi thleng nawn tawh lo se kan duh.
- Tihluihna hmanga he protest hmahruaitu Sonam Wangchuk, sorkarin Safdarjung Hospital-a tihluihna hmanga a hreng lui hi kan dem tak zet a, thu tiamkam awmloa chhuah nghal turin kan phut a ni.
- Mizo zirlaite himna leh hamthatna atan vawiina Mizo zirlai leh thalai kalkhawmte hian thawhho zel nise kan ti.