Aizawl: Special Court, Prevention of Corruption Act Judge, F. Rohlupuia chuan Mizo Carbon Product subsidy eiruk thubuaiah mawhphurtua puh mi palite chu Ningani khan thiam loh a chantir a, heng mi palite hi Section 120b, 420 leh 471 IPC hnuaiah thiam loh a chantir a; mi dang 13-te erawh thiam a chantir thung.
Special Judge F. Rohlupuia chuan Ravi Gulgulia, Vimal Kishore, Pramod Bharech leh Sandeep Agarwal te chu thiam loh chantirin, prosecution-te chuan an chunga puhnate chu rinhlelhna tur engmah awm lo khawpin an finfiah thu a sawi a. Amerawhchu, court chuan mawhphurtua puh dangte an puhna erawh chu rinhlelhna tur awm lo khawpa prosecution-ten finfiahna an pek zawh loh avangin thiam a chantir thung.
Court chuan Dr. Margareth M Varte, Biswajit Chanda, Kajal Kanti Dey, J. Lungawia, Suchil Kumar Goyal, Atul Goyal, Praveen Choudhury, Santosh Kumar Jain, Lalrohlui, Rozama, LV Vanlalrema, John Saikhuma leh Navin Jain te an puhna chu rinhlelhna tur awm lo khawpa prosecution-ten finfiahna an pek zawh loh avangin thiam a chantir thung.
He thubuai hi kum 2017 atangin hun rei tak chhung a lo kal tawh a. Industrial Growth Centre, Luangmuala Mizo Carbon Product Ltd chuan sorkar laipuiin hmarchhak biala thil siam chhuahna tihhmasawnna atana a ruahman, Central Transport Subsidy (CTS) leh Central Capital Investment Subsidy (CCIS) a pekte chu dik lo takin an dil nia sawi a ni a. CTS leh CCIS hnuaiah hian Rs. vbc 3.41 vel an la tawh nia sawi a ni a. CTS Leh CCIS hnuaia subsidy dawng tur hian coke siam chhuahna tura hmanrua te, phurh kualna leh lehkha dangte chu lehkha lem hmanga lak vek niin a sawi tih www.jclalnunsanga.in a tar lang.