Aizawl: New Delhi-a cham mek, Disaster Management & Rehabilitation (DM&R) Minister Prof Lalnilawma chuan Thawhtanni khan disaster management chungchanga Mizoram mamawh hrang hrang project lo thehluh tawhte bawhzuiin, sorkar laipui thuneitute a dawr.
Minister hian African Swine Fever (ASF) avanga vawk vulhtute harsatna – Rs vbc 485.37 zet chan ta te tan zangnadawmna sang zawk an dawn theih nan, ASF chu State Disaster Relief Fund hnuaia Notified Disaster-a puang turin rawtna a thlen nawn a ni.
Minister hian rawtna leh dilna hrang hrang sorkar laipuiah hian umzui bawkin, Lawngtlai Bazar Veng leh Chandmary-a leimin vanga Central Special Assistance Rs vbc 21 dilna leh, National Earthquake Risk Mitigation Programme (NLRMP) Phase-I hnuaia Ngaizel, Serchhip, Champhai leh Siaha a leimin chungchanga Rs vbc 50 dilna te leh, Aizawl, Lunglei, Serchhip, Champhai leh Siaha district tan NERMP Phase-I hnuaiah Rs vbc 95.76 dilna a umzui bawk.
Prof Lalnilawma hian kum 2021–2025 chhunga Cyclone Remal, tuilian, leimin, mautam leh ASF avanga Rs vbc 873.22 mamawhna Post Disaster Needs Assessment (PDNA) Report chu Home Affairs Ministry-ah a thehlut nghal bawk.