Mizorama Tipper hmanga eizawng pawl pathum awmna – Mizoram Tipper Association Joint Committee chuan Dholai leh Lailapur vela balu var an lak thinnaah harsatna an tawh fo avangin August thla atang hian Mizorama phurh luh turte dan an tum thu an sawi.
An sawi dan chuan an balu zu lak thinnaah hian helai vela mite hian buaina leh harsatna an lo siamsak fo a, Assam Forest department phei chuan July 15 khan an member te lirthei pali an mansak niin an sawi bawk.
Balu mamawhna hi a sang a, khawpui leh thingtlang hmun hrang hrangah hmasawnna hnathawh a tam tawh avangin phurh luh pawh hi a tam lo thei lo bawk. Hetih lai hian heti lama eizawng pawlte thlawpna ni bawkin hnathawktute pawhin kan ram leilunga balu hman uarna hunah hmang thei ila a duhawm hle.
Kan ram balute hi a tha a, pawisa nise keimahni mizopui ngeite kuta a luh dawn avangin hnamdang tel lo hian harsatna kan tawk bik lo tih hriat tharna hun remchangah hmang thei ila a va tha em.
Langkaih balu te hi balu dang zawng zawng aia tha leh rintlak nia sawi a ni a, a lo to deuhin a nih pawhin hnamdang kuta pawisa lut tur a ni chuang lo a, keimahni mizopuite ngei nen kan indawr tawn theihna hun a ni tih hriain remchangah hmang hlauh thei ila, Tipper hmanga eizawng pawlte hmalakna hi tha taka zawm chungin, keimahni lam inpuihtawnna remchangah i hmang hlauh teh ang u.