Ram puma zirlaiten tun hnaia lungawi lohna an lantir chhan ber, exam zawhna put thin venna tura sorkarin dan thar a siam tur a pharhah chuan zawhna puta inhnamhnawiha thiam loh chantirte chu kum 10 chhung lung in tantir leh Rs nuai 50 chawitir theih a ni dawn.
July 20-a zirlaiten parliament pana kawng an zawh laia venhim hna thawktuten kut an thlak nia sawi sawiho phuta eptu MP-te an au bengchhen karah Minister of State for Prime Minister’s Office Jitendra Singh-a’n Thawhtanni khan bill thar hi a pharh a ni.
Tun hnaia NEET zawhna put avanga nawrh huaihawttu, Cockroach Janta Party (CJP) chuan hnehna changin an duh angin Inrinni khan Union Education Minister Dharmendra Pradhan-a chu a bâng bawk.
Singh-a’n dan thar siam tur a pharh hi Public Examinations (Prevention of Unfair Means) Amendment Bill, 2026 niin Public Examinations (Prevention of Unfair Means) Act, 2024 siam thatna tur a ni a, zawhna put thubuai chu thla hnih chhunga chhui hna thawh zawh tura duan a ni.
Zawhna put vanga thiam lo changte chu kum 2024-a dan siam hman meka kum thum atangin kum nga tang tura hrem theiha dah chu kum 10 tang thei tura tih a ni a. A hmaa Rs. nuai 10 chawi tura tih pawh Rs. nuai 50-ah tihsan a ni bawk.
Dan bawhchhiatna hi a huhova tih a nih chuan bill pharh takah hian a tlem berah kum sarih hremna pek a rawt a, Rs. vaibelchhe 10 thleng chawitir theih a ni bawk dawn.
Dan thar tura duanah hian dan bawhchhiat theihna chi 15 tar lan a ni a, hengah hian zawhna put, OMR sheet tihdanglam, website lem siam leh admit card lem pek chhuahte pawh a tel dawn a ni.
Bill-ah hian state leh union territory-te chu thubuai thehluh atanga thla thum chhunga ngaihtuah zawh hman vek theihna tura fast-track court din theihna thuneihna pek an nih tur thu tar lan a ni a. Sorkar laipui chuan zawhna put thubuai thenkhat chhui tura special task force din turin thuneihna a pe dawn bawk a ni.
Delhi-a nawrh huaihawttu zirlaite tharumin an beih nia sawi awm sawiho phuta eptu member-te an au bengchhen laiin bill hi pharh a ni a. Lok Sabha Speaker Om Birla chuan member-te chu sawihonaah tel ve turin a ngen a, “Public exam kalpui dan tihchangtlunna kawnga hmalakna hmasa ber a ni a, au buai ai chuan rorelna inah bill chungchang hi in sawiho tur a ni. Sorkar chuan in rawtna siam thatnate chu a tum ang,” tiin eptute hi nasa takin khap daih a tum.
Eptute hi an bengchhen chhunzawm zel avangin speaker chuan chawhnu dar 2:00 thleng rorel a titawp lailawk a. An thukhawm chhunzawm leh hnuah pawh an la bengchhen zel avangin tlai dar 5 thleng a tihtawp leh bawk.
July 20 atanga parliament fur thutkhawm kal mek hi a chawlhkar hmasa ber chu ram puma Pradhan-a bân tura nawrna thawmin a luah khat a. Eptute chuan Delhi-a Jantar Mantar leh hmun dangah zirlai rualte thlawpin minister hi a bân an phut a. Inrinni khan minister hi a bâng ta a ni.
Eptute hian lungawi lohna lantir laia venhim hna thawktute chet dan duh lohna an aupui zui leh mek a, pellet gun hman nia sawi chungchangah Delhi Police thununtu, Union Home Minister Amit Shah chu sawi fiah turin an phut.
Sorkar chuan ram chhunga exam kalphung siam thatna tur ngaihtuahtu tur task force a din thar bawk a, Infosys dintu pakhat zawk, Nandan Nilekani-a kaihhruai tur niin zawhna put awm thin a bo theih dan tur an ngaihtuah ber dawn a ni.