- Zirsangkima
Sava zíngah Vakî a tawng tam ber. Tawng theih kha a thilpêk dawn a ni. Mahse, sáng takah a thlâwk ve thei lo. Mupui erawh chu a tawng ve vak vak ngai lo—a cool raih reng! Sáng takah, vàn tawng dáwn dâwnin a thlâwk vawn vawn thìn. Sava dangte aiin a huaisen bîk a, thil a ti thei bîk bawk. Hring fate hian an hnên atangin zir tùr tam tak kan nei.
𝟏 𝐀𝐦𝐚𝐡𝐢𝐧 𝐚 𝐭𝐡𝐥𝐚𝐰𝐤 𝐭𝐡𝐢𝐧
Mupui hian Chawngzawng a thlawhpui kan hre ngai lo a, Tlaiberh a thlawhpui kan hmu ngai hek lo; a dawih phah chuang lo. Amah chauhin vànah a invawrh vawn vawn thìn. Vàn sángah chuan a nihna a lang chiang thìn a; amah paw’n a nihna a inhriat chian phah bawk thìn. Thlawhpuia thawhpui neih ai chuan amahin, inringtâwk tak leh zalèn takin a thlâwk mai thìn.
Mahni inhre chiang tùr chuan mahnia kal ngam a ngai fo. Mi rilru kàwi, mi rèl chíng te leh rilru piangsualte nèna hring nun zin kawng zawh ho ai chuan, huaisen taka mahnia kal ngamna nun kan neih a pawimawh. Kristian nunah pawh “finrial nun” kan tih fo nei tam apiang an thlâwk sáng thìn.
𝟐 𝐓𝐡𝐢𝐥 𝐚 𝐡𝐦𝐮 𝐟𝐢𝐚𝐡
Mupui hian km ngaa hla atang pawhin a ei tùr chaw chu fiah takin a hmu thei an ti. Chiang takin a ei tùr a hmu a; a vawi khat hmuh tawh chu, harsain khirh hle mah se a hlah ve mai mai ngai lo. A tumah a chiang a, thil dangin a ti buai ve thei tawh lo.
Keini paw’n tum (aim) leh hma thlìr (vision)-te chu kan nei ve thìn. Hmu chiang tâwkin kan inngai chiah em? Kan tum ram thleng tùrin keimahni leh keimahni hi kan inti buai fo zâwk thìn lo maw?
Kan tum ram thleng tùr hian kan tumah chiang ila, thil hrang hrang ti kual dun dun loin, tum nghet cherh chawrh nei ve ila, hlen ngei tumin tha leh zung séngin theih tâwp i chhuah ve thìn ang u.
𝟑 𝐒𝐚-𝐫𝐮𝐚𝐧𝐠 𝐚𝐧 𝐞𝐢 𝐧𝐠𝐚𝐢 𝐥𝐨!
Mupui hian sa thi tawh, sa ruang an ei duh lo. A nung lai ngei kher manin an ei thìn. A tawih tawh leh lung chhuah tawh phei chu an hnâwl ngei ngei. A thar ngat; la thah loh; a nung chung ngei lo chu chawhmeh atán an duh ngai lo.
Keini paw’n kan nuna thil kal tawh, duh loa hnâwla kan kalsan hnu, kan nun hlui kha kan phùm bo ngam ve a ngai fo. An liam tawh e. Kan nuna thil hmuar leh tawih tawhte theihnghilha kalsana, ei tùr tharlám kan zawn a ngai tawh zâwk a ni. Rilru thar, tùna nung mék—“kan vawiin hi” kan ngaihtuah a ngai tawh zâwk. Ni tin thil thar hma chhawn zêl tùra kan inbuatsaih a ngai e.
𝟒 𝐓𝐡𝐥𝐢𝐩𝐮𝐢 𝐚𝐧 𝐥𝐚𝐰𝐦!
Khawpui a ri dur dur a, káwl a phe zawr zawr a, thlipui a tleh vâwk vâwk a, ruahpui vàn-àwn a súr chiam bawk. Hêng hunah hian sava dangte chu hlau leh khùr chungin, bakléngin an sahimna tùr hmun panin an tlänchhe dàwr dâwr thìn. Hetiang hun hi Mupui tán chuan a birthday a ni ringawt—a hun nuam tih ber a inher chhuak tlat! Thlí a nat zawh poh leh a thlâwk sáng zual sauh a; thli chakna chu tanpuituah a hmang hlauh thìn.
Harsatna thlipui kárah hian chakna a inphúm ru thìn a, buaina leh manganna khaw dur kárah hian chhelna a awm thìn ti hi Mupui nun atang hian i zir chhuak ve ang u. Manganna leh fiahnate hi Mupui chuan remchángah a hmang thiam a, hnehtu a nih phah thìn.
𝟓 𝐀 𝐛𝐮-𝐚 𝐡𝐧𝐢𝐦 𝐡𝐧𝐚𝐡 𝐧𝐞𝐦 𝐚 𝐩𝐚𝐢𝐡 𝐭𝐡𝐢𝐧
Mupui no të hi puan ném thlep (a bû) nuam takah piangin an thang lian ngai rëng rëng lo. An bû chhuahsana mahnia chaw an inzawn hun a la thlen dáwn avàngin an note hi nuamsain an enkawl ngai hek lo. A nuam china chàm reng hian a puitlin theih loh a, induat hliau hliaua inenkawl reng hian thanna a däl mai ni loin a than theih loh tih zirlai an hre chiang hle—Mupui mah hian!
Keini chu sava kan ni lo; an aia chungnung fé-a duana din kan ni. Mahse, a nuam chin pelh kan harsat hle thìn thung. A him chin leh a nuam chin atang hian hnehna hlado chham theih a ni ngai lo tih hi Mupui nun atang hian i zir tel leh ang u.
𝟕 𝐌𝐢 𝐢𝐧𝐩𝐞 𝐚𝐧 𝐧𝐠𝐚𝐢 𝐬𝐚𝐧𝐠
Mupui nù hian a pa chak leh huaisen an ngai sáng khawp mai. An kawppui atán pawh, an tána inpe thûk ngam apiang an thlang thìn.
A nù chu thingtang kengin sáng takah a’n thlâwk a. A phâk tâwka sáng a thlawh hnu chuan thingtang chu leiah a’n thlauh ta a. Chu chu lo man tùrin a “in léng pa” chu a’n hriattír a. A in léng chuan lei a thlen hma ngeiin thingtang man tum chuan a inbirh thla vawn vawn thìn. Thing tang chu a tlâk chak poh leh man tumin a thlâwk chak ve zêl a; a man hman loh vaih chuan a “Dí” rin a hlawh thei dáwn tlat lo a . . .
Keini pawh hian kan kawppui tùr emaw kan mi rawih tùrte emaw hi kan fiah ngam hmasak a tùl cháng a awm ve thìn. Tin, kan hmangaihte chang tùr leh kan tum ram thleng tùra fiahna kan tawhte hi, kan theihna zawng zawng hmanga kan hlawh chhuah a ngaih hun a awm ve fo a nia.
𝟖 𝐒𝐢𝐚𝐦 𝐭𝐡𝐚𝐫𝐧𝐚 𝐧𝐮𝐧 𝐧𝐞𝐢 𝐭𝐮𝐫𝐢𝐧 𝐚𝐧 𝐭𝐮𝐚𝐫 𝐧𝐠𝐚𝐦
He thu hi thu ngaihnawm a ni a; he thu ziak lai mu pawh a ni. Amaherawhchu, he thu hi biological proof ni loin, pi pu atanga an inhlan chhàwn thu a ni tih hre tel ila.
Mupuite hi kum 70 dam tling tùra ngaih an ni. Sava dangte aia an taksa a chak bîk vàng lam ni loin, an rilru a huaisen bîk vàng a ni. Mahse, kum 40 an han tlin meuh chuan an tar ve bawih tawh thìn! An thla ringawt pawh rit tiin phurh hrehawm an ti tawh a, an zâp muang ta raih thìn.
An hmui te pawh a hriam tâwk tawh lo a; an ketang leh an ke tinte pawh, sa han chhar nalh thei tùr khawpin a hriam tâwk tawh hek lo. An hmul te pawh a lo chhah tap tawh a, a rit lawih tawh a, taksa chak tâwk tawh loh nèn, han thlawhpui vawn vawn pawh thil harsa a ni ta!
Chutah tak chuan Mupui chuan duhthlanna khirh tak a siam a ngai thìn. Chu chu: a chak loh ang anga thih nghâl daih emaw, a dam chhúnga thil khirh ber leh hrehawm ber pal tlanga kum 30 dang dam leh emaw a ni.
Ni 150 chhúng tehmeuh mai “siam thar lehna” chang tùra na tuara vial ngawih ngawih chu Mupuite hian an thlang fo—kum 30 dang an dam leh theih nán. Hmabâk erawh a khirh fat!
A hmasa berah chuan, an hmui—sei leh hriam hreih hrawih tak ni thìn, tùna lo bil ta mul mai chu lungpui hriama an tauh chhiat vek a ngai phawt. A hnuah, “Hmui thar a lo insiam leh ta! A lo hriam leh ta e,” an ti dáwn chauh a, chu an hmui “siam thar” hmang chuan an ke tin hlui chu an kheuh bulh leh vek a ngai leh. Ke tin kheuh bulh chu keini hian kan ngam ve ang em le . . . ?
Ni 150 atanga ni 180 vêl zet ke tin thar neih nán an han nghâk leh vang vang a. Chumi hnuah, ke tin thar sei leh hriam tak an nei leh ta. Chü an ke tin thar hmang ngei mai chuan anmahni hmul chu, a mal te tea an inpawh kawlh vek a ngai leh a…
Chutianga hmul nei loa káwng mala an awm atanga thla nga a lo inher liam leh meuh chuan, Mupui chuan “siam thar lehna famkim” a lo chang ta chauh thìn a; kum 30 dang dam leh tùrin a inpeih leh ta chauh thìn a ni.
A va hautak dáwn êm! Mahse, he nun—siam thar lehna nun nei tùr hian, hêng hrehawm zawng zawng hi Mupui hian a pal tlang a ngai miau si a.
𝐇𝐞𝐢 𝐡𝐢 𝐢 𝐡𝐫𝐢𝐚 𝐚𝐧𝐠 𝐮
Chàn ngamna leh kalsan ngaite kalsan ngamna nei lo tán siam thar lehna a chan ngawt theih loh, tih i hria ang u. Kan hmaa harsatna awm thei zawng zawng, chhel tak leh huaisen taka hma chhawn ngam lo tán malsàwmna a dawn ngawt theih hek loh. Nun thar, nun hlimawm, “tar harna” kan nei duh a nih chuan, huaisenna, inpêkna, tawrhna, thawhrimna leh beih hrâm hrâmna kan neih tel a ngai a ni.