Real Madrid manager hlui, Zinedine Zidane-a chu France national team head coach atan rawih a ni ta.
France team enkawl rei ber, kum 14 kaihruaitu, Didier Deschamps-a chu Spain laka 2026 World Cup semifinal-a an tlawm hnuah a chhuak a ni.
France tana World Cup nomawi lo la tawh, Zidane-a hian kum 2021-a a vawi hnih nana Real Madrid a chhuahsan hnuah team enkawl a la nei leh lo.
Kum 54 mi, France player ropui bera an chhal hian 2030 World Cup qualifier khelhpuia tlinpui turin contract a ziak a ni.
An ram enkawl tura tihfel a nih hnuah French national team kaihruaitu nih chu ‘chhuanawm tak’ a nih thu a sawi.
“Ka sawi tawh thin angin French national team aia ropui a awm lo va. Manager nih theih hi thil chhuanawm tak a ni,” a ti.
“Mawhphurhna lian keng a ni a. French Football Federation president Philippe Diallo, executive committee leh federation ten min rin tawkna leh kum 14 chhung Didier-a leh a staff an rintawknaah lawm thu ka sawi a ni,”a ti.
Diallo-a pawhin an head coach thar chu French football ‘legend’ a ni tih a sawi.
Zidane-a’n a thlak tak, Deschamps-a khan France hi inelna lianah vawi thum final a thlenpui a, a vawi hnih nan kum 2018 khan World Cup-ah a champion-pui nghe nghe.
Zidane-a’n inelnaa an ram a feh chhuahpui hmasak berah September 25-a Nations League-a Turkey an tlawh ang.
2006 World Cup zawha inkhelh a chawlhsan hnuah Zidane-a hi management-ah kum 2014 khan a lut chauh va, Real Madrid Castilla an tih, club B team a enkawl tan.
First team manager atan January, 2016 khan lak niin season tawpah Champions League final-ah an thenawm, Atletico Madrid chu penalty petah a hnehpui.
Hei hi Madrid tana a zawna Champions League nomawi pathum a lak bul tanna a ni a, Champions League tia a hming thlak a nih hnuah a zawna champion thei hmasa ber a nihpui a. European Cup a nih lai atanga chhiarin kum 1976-a Bayern Munich dawta a zawna vawi thum champion thei hmasa ber a ni bawk.
La Liga-ah 2016-17 champion a nihpui bawk a; mahse, a dawt leh season-ah Bernabeu-ah inthlak danglam tul a awm nia sawiin a chhuak.
Zidane-a hi an chet chhiat avangin Madrid-ah bawk March, 2019-ah kir leh a, La Liga-ah 2019-20 khan a champion-pui zui leh bawk.
Madrid-a a awm chhung hian mi langsar tak tak pawh a la lut a, heng zingah hian Eden Hazard leh Rodrygo te pawh an tel.
2020-21 season-ah nomawi lak nei lovin Zidane-a hian a chhuahsan zui a, a hnuah eng team mah a enkawl leh ta lo.
Hun rei tak France manager atan sawi rik a ni tawh a, 2010 World Cup-a group stage an paltlang zawh loh tum daih tawh atang khan sawi a ni tawh.
Kum 16 hnuah a tak a thleng dawn ta a, French team chu Euro 2028-ah tlinpui a tum dawn a ni.
Zidane-a hian a football khelh bul hi kum 1989 khan Cannes-ah a tan a, Bordeaux a pan hnuah kum 1996 khan Juventus a zawm.
Attacking midfielder hian Italian club hi Serie A-ah a zawna a champion-pui bakah a zawn bawkin Champions League final a thlenpui a, kum 2001 khan Real Madrid a zawm.
Zidane-a hian £ maktaduai 66-in Madrid hi a zawm a, a hun laia khawvela player man to ber a ni a. Real Madrid-in Galacticos an tih an din lai kha niin khawvela player langsar – Ronaldo, Luis Figo leh David Beckham te an la.
A man hi a phu a ni tih lantirin 2002 Champions League final-ah mawi lutukin a volley lut a, Madrid-in Hampden Park-ah Bayer Leverkusen chu 2-1-in an hneh.
France national team tan Zidane-a hi mi mala thawh hlawk ber pakhat a ni a. Paris-a 1998 World Cup final-ah khan vawi hnih a tauh lut.
France hian 3-0-a Brazil hnehin a vawi khat nan World Cup champion an ni a, kum tawpah Zidane-a hi Ballon d’Or hlan zui a ni.
Zidane-a hi Euro 2000 champion France team-ah pawh a tel a; mahse, 2002 World Cup leh Euro 2004-ah an che chhe hle thung.
Kum 2004 khan ram tana inkhelh a chawlhsan a; mahse, 2006 World Cup khel tur zawn laiin a kir leh a, a khel zui leh.
France-in knock-out stage luta final an luh theihna kawngah a thawh hlawk leh hle a. Italy nen final-ah intumin professional footballer nia a inkhelh hnuhnung berah hian minute sarihna lekah Panenka penalty pet lutin hma a hruaipui.
Italy hian sutin extra time khelh a ni a, Zidane-a hian Marco Materazzi-a tauh tluin hnawh chhuah a ni a. Italy hi penalty petah an chak zui a ni.