Aizawl: Mizoram Govt. Adhoc-Aided High School Teachers’ Association (MIGAHTA)-in sorkar laka an lungawi lohna leh sorkara an duhnate lantir nan Peaceful Sit-in Demonstration neih an tum.
MIGAHTA chuan kum 2023 khan sorkarin Adhoc High School-te hi kum 15 an awm hnuah Provincialised-ah a lo kaisan tir tawh a, signboard leh seal te pawh siamtir vek tawh mah se, thla kua hnuah he thutlukna hi hnukdawk leh (revoke) vekin, sorkar chuan kum hnih liam hnuah kum 20 kaltaa an dinhmun Lumpsum-Grant-in Aid-ah a dah nawn leh ta zawk a ni.
Hetianga provincialised hlihsak a, dinhmun hniam zawka dah an ni chu pawi an tih thu sawiin, “Tuna thawk mekte an chawlh hunah an aiawh tur zirtirtute chu hlawh tlem tea lak an ni tawh tur hi zirtirtu dinhmun dahhniamnaa kan ngai a, thalai lehkhathiam hna zawng mekte beidawnna siamtu a nih vangin kan dodal zel dawn,” an ti.
MIGAHTA chuan sorkara an thil phut nawr nan hian chawlhkar hmasa khan badge dum belin leh ‘No Teaching Day’ hmangin hma an lak tawh bakah, July 27 leh 28 chhung khan Mizoram puma Adhoc High School 90 chuanga thawktute chuan Mass Casual Leave hi an la a ni.
An lungawilohna lantirna kalzelah Nilaini hian Vana Pa Hall kawtah ‘Peaceful Sit-in Demonstration’ neih an tum bawk.
Sorkara an dilna leh ngenna ten awmzia a neih loh chuan na zawka hmalak chhunzawm zel tum thu a. Heng an hmalaknate hi khawtlang school dinhmun tlahniam tur venna leh thangthar hna zawng mekte hmakhua a ni tih hriatsak turin an ngen.