Assam Legislative Assembly member zawng zawngte chuan party sawi lovin tun laia an state chuan chung lam district-a tui lian tuar nasa zualte puih nan an thla khat hlawh theuh an pe dawn.
Thutlukna hi Thawhlehnia assembly budget session neih mekah siam niin Sivasagar, Charaideo, Jorhat leh Golaghat district-a harsatna tawkte sum hi an thawk khawm dawn a ni.
Thutlukna an siam chungchangah hian Tinsukia bialtu BJP MLA Pulak Gohain-a chuan Assam chuan chunga tui lian hian an state a nghawng nasa hle a, khua leh tui tinte mawhphurhna a ni tih hriain an aiawha an thlan chhuahten an ai an awh hun nia an hriat thu a sawi.
“Sivasagar, Charaideo leh Jorhat-a tui lian nasa tak hian mipuite tan harsatna a thlen nasa hle a. He hun khirh taka kan thlawpna kan lantir hi kan tih tur a ni a. A tuartute hian an nunkhua an tun din leha an mamawhte rang taka an neih theih kan duh a. Chumi rilrua neih chungin rorel lai leh eptu MLA-te zawng zawngin kan thla khat hlawh hi tui lian tuarte tan kan hlan dawn a ni,” a ti.
Srijangram bialtu Congress MLA Nurul Islam-a pawhin thutlukna siam chu lawmawm a tih thu leh rang taka tihfel a tul thu a sawi.
“Thutlukna tha tak a ni a, a tir atangin kan inpeih sa a. MLA zawng zawng, eng politic party-a mi pawh ni se, kan thla khat hlawh theuh kan pe dawn a. Tui lenna hmuna chengte hian dinhmun khirh tak tawk mekin sum leh paia puih hi an mamawh tak zet a. Sorkar laipui pawhin a ngai pawimawh a, a hma thei ang bera chhawmdawlna pekna tur a puang tawh a ni,” a ti.
Assam-ah hian tun hnaia fur ruah sur nasa avangin tui a lian nasa hle a, thi pawh mi 70 vel awm tawhin thlai chinna hmun pawh a chim chhe nasa hle.
Tun kar tir atang khan ruah a sur tlem deuh avangin an dinhmun harsa zualpui erawh a kiam tan mek a; mahse, mi tam tak chenna in chhia an awm avangin baihvai leh relief camp-a awm ngai an la awm nual a. A len nasat lai chuan mi nuai 65 chuangin harsatna an tawh phah a ni.