Enzo Maresca chuan Pep Guardiola aiawha Manchester City manager nih chu chawimawina a nih thu a sawi a. Sir Alex Ferguson-a’n chawlh a lak hnua Manchester United tlahniam ang maia tlakchhiattir ve lo tura a intiam tlat thu a sawi.
Etihad Stadium-a kum 10 a awm chhungin Guardiola khan nomawi 20 a la a, season liam ta tawp khan a chawl a. Maresca hi a assistant lo ni tawh leh City-a elite development system coach lo ni tawh a ni a, a pu hlui hmun ruak luah chu a phur tawh hle.
Kum 46 mi Italian coach hian City hlawhtlinna hi a chhunzawm zel theih a ring a. Guardiola, Manuel Pellegrini leh Roberto Mancini te hnuaia club kalphung chu puitling hle tawh nia a hriat vang a ni.
Ferguson leh Arsene Wenger ten an chhuahsan hnua United leh Arsenal tlahniam zui vak ang kha an chungah a thleng ve lo ang tih a tiam.
“Club-in kei min ruat ta hi ka tan chuan chawimawina a ni a. Pep-a hi kum 20-25 chhung liam taa khawvela coach tha ber a ni awm e. Mahse, hei hi chona lian tak a ni a, a phurawm hle. Chanvo hlu tak a ni bawk. club pakhat kum tam tak lo enkawltu manager-te chhuah hnua harsatna thleng zui thin chanchin kan hria a. He club, fan leh mipuite tan a tira thil dik tak tih nghal chu chona lian tak a ni,” a ti.
“Kalphung tha tak neih hi thil pawimawh ber a ni a. He club hian kum 17 chhungin manager pathum chauh an la nei a. Chuvangin, tha taka hna kan thawh zui zel theih chhan pawimawh tak, min tiphurtu pakhat a ni a. Mancini, Pellegrini leh Pep ten kum 14, 15 chhung zet hna tha tak an lo thawh puitlin tawh chu kan chhunzawm zel thei a ni,” a ti.
January-a Chelsea a chhuahsan dan chungchang erawh Maresca hian sawi zui a hreh hle a, City chuan Guardiola aiawh tura Maresca an lak avangin an elpui, London club hnenah zangnadawmna atan pound maktaduai 17 zet an pe a ni.
Stamford Bridge-a Club World Cup leh UEFA Conference League lakpuitu chuan a club entawk hlui pahnih, Leicester leh Chelsea-ah a vannei tak zet tih a sawi bawk.