Aizawl: Mizoram Legislative Assembly hnuaia Subject Committee-V te chuan Chairman Lalramliana Papuia kaihhruainain Aizawl Smart City Ltd. (ASCL) hnuaia enkawl Common Biomedical Waste Treatment Facility, Tuirial-a mi chu Nilaini khan a hmuna tlawhin an hnathawh te an endik.
Subject Committee-V member MLA-te — Lalchhuanthanga, H. Lalzirliana, Lt. Col. Clement Lalhmingthanga leh R. Rohmingliana-te chuan endikna hun an neih hnu hian Assembly Secretariat, ASCL Official-te leh a hmuna hnathawkte nen inkawmhona buatsaih nghal niin, Committee chuan he Treatment Facility-in a hnathawh leh tangkaitnate chu lawmawm an tih thu an sawi.
April 1, 2025 atanga March 31, 2026 chhung khan he Treatment Facility hian biomedical waste kg 2,99,170 lakhawmin a lo sawngbawl a. Mihring pung zel leh hmasawnna thang zelah biomedical waste hi a la pun zel dawn avangin, Committee chuan hmalam pan zel tur leh hmasawn zel turin hnathawkte hi an fuih bawk.