Aizawl: School Education Minister Dr. Vanlalthlana chuan zirtirtu transfer & posting pawh online-a kalpui a nih tur thu a sawi.
Nilaini khan School Education Directorate Conference Hall-ah Akhil Bhartiya Shiksha Samagam (ABSS) leh National Education Policy (NEP) 2020 kum 6 a tlin champha lawmna hun buatsaih a. Khuallian Education Minister chuan zirna siamthatna tura sorkar hmalakna hrang hrangte sawiin, school tha tehna leh enpuitu tur School Assessment Board din a nih dawn thu leh zirtirtu transfer & posting pawh online-a kalpui a nih tur thu a sawi.
MBSE chu Skill Development-ah Awarding Body a nih theih nana nawr mek a nih thu leh Mizoram Engineering College-ah nakkum atanga class tan a nih theih nana hma lak a nih thu a sawi a. NIT Lengpui tihhlawhtlin nan Mizoram sorkarin forest clearance atan Rs vbc 10 a pe tawh tih a sawi bawk.
He hunah hian Mizoram Education Reforms Committee Working Chairman Prof. Lalbiakdiki Hnamte pawhin thusawiin, NEP 2020 puitlinna tura harsatna awm te, exam leh zir dan kalphung siamthat a tul thute leh technology hmanrua hman tangkai a pawimawhziate a sawi.
Inkhawmah hian Mizoram Education Reforms Committee member te, School Education Department Director leh Officer te, Higher & Technical Education Director leh Officer te, MBSE Chairman leh Officer te, SCERT Director leh Officer te, Samagra Shiksha SPD leh Officer te, College leh Higher Secondary School Principal te, Zirtirtu Association hruaitute leh tlawmngai pawl hruaitute an tel a ni.