Aizawl: Mizoram Govt. Adhoc-Aided High School Teachers’ Association (MIGAHTA)-in sorkara an thil phut a hlawhtlin theihna atana nawr nan Sit-in Demonstration an nei.

MIGAHTA chuan sorkarin provincialise-a a hlankai tawh sutsak an ni leh dinhmun hniam zawk, Lumpsum Grant-in-Aid a dah an tum duh lohna ni ruk chhung an lantir tawh hnuah awmzia a neih loh avangin Nilaini atangin Vana pa Hall tualah Peaceful Sit-in demonstration an nei a. Kalkhawmnaah hian provincialise an nih tawhna sorkarin a revoke-na order te, tun hnaia school thenkhat a provinvincialise-na order-te leh sorkarin Lumpsum grant-in aid a dah thlak tumna rule-te an hal.

Tun chawlhkar Zirtawpni thleng Peaceful Sit-in demonstration neih an tum a. He an hmalakna pawh hian sorkar atanga thu lawmawm an dawn loh chuan na zawka nawr zel an tum.

Tar lan tawh angin, MIGAHTA hian lungawi lohna lantirin July 21 leh 22, 2026 khan badge dum an lo bel tawh a, July 23 leh 24, 2026 khan No Teaching Day hmangin, July 27 leh 28, 2026-ah te Mass Casual Leave lain sikul an khar vek a ni.

MZP palai

MIGAHTA-ten an school-te provincialised tura an nawrhna avangin MZP chuan zirlaite zirnain nghawng tha lo a neih palh a hlauthawng a, palai hna thawkin hma a la.

An hmalakna hmasa ber atan Nilaini khan School Education Minister Dr. Vanlalthlana chu MZP Pisa Puiah kawmin MIGAHTA thil ngiat leh an nawrhna chungchang an sawipui a. Hemi hnu, chawhnu dar 3 khan Chief Minister (Political) Adviser Lalmuanpuia Punte, MLA hova inbe lehin MIGAHTA te leh MZP hruaituten zirtirtute harsatna leh thil phutte an sawiho bawk.

MZP chuan zirlaite hmakhua leh zirnain a tawrh loh nan MIGAHTA leh sorkar chu an inbiak fel thuai a beisei thu an sawiin inremna a awm theih nana palai hna thawkin hma a la chhunzawm zel dawn tih a sawi a ni.