Europe hmun thenkhatah ramkang nasa tak a awm mek avangin nunphung a buai a, chhiatna nasa tak an tawk mek. Hetiang hi an dinhmun a nih tak avangin George leh Amal Clooney te nupa chuan France a an chenna in chu an chhuahsan rih thu an sawi.
An pahnih hian fapa phir Alexander leh Ella, kum 9 mi an nei a, an chhungkua hian France khawchhak lam, Provence-Alpes-Cote d’Azur biala Brignoles khawpuiah an cheng a ni.
France ram bakah, Spain, Italy leh Greece ram ten ramkang nasa tak an tuar mek a, an chenna hmun pawh hi him dawn lova an hriat avangin an chenna hi an chhuahsan lailawk a ni.
An nupa hian helai Brignoles bial Mayor hnenah lehkha thawnin, an insawn rih tur thu hi an sawi a, an lehkhaah chuan an tan himna a awm zel dawn em tih an sawi theih loh avangin an sahimna hmun tur an zawng rih nia ziakin, Mayor leh khaw mipui zawng zawng chu him se an duh thu an ziak tel bawk a, puih an ngaihna leh khawtlang tana ke pen vena tur awmah erawh chuan engpawh tih ve an huam thu an sawi.
Kum 64 George leh kum 48 mi Amal te hian tuna an chenna hmun hi chhungkaw thar din a, khawsak nan an lei a, khawpuia seilian ni chungin an nun bul tan nan leh mahni insiamrem chawpin an khawsak thu nikum lam khan an interview-naah an lo sawi tawh a, tunah erawh ramkang nasa avangin an awm zel dan tur hriatthiam a la har rih niin an sawi a ni.