Lirnghing na takin Japan chhimthlang lam a sawia thi chu mi 30 an tling tawh tih Prime Minister Sanae Takaichi-i’n Ningani khan a sawi.
Thawhlehnia magnitude 6.8-a nain Kyushu thliarkara Kumamoto prefecture a sawiah hian in chim chhe karah chhanchhuah hna thawktute chuan dam an awm em tih an dap zui zel a. In leh power line tam tak a chhia.
Thi zinga tam tak hi shopping centre chima mite niin a hnu darkar khat velah mall-ah hian na taka thil puak a awm zui bawk a ni.
Mi sang tel evacuation centre-ah awmin khaw lum takin a tuam bawk avangin intihdaihna tur leh an mamawh tawk tui pek a hautak hle.
Prefecture-ah hian 39°C a kai thei dawn niin khawchin thlirtute chuan an sawi a. Thuneitute chuan khaw lum avang hian chhanchhuah hna thawktu leh chhanchhuahte tan harsatna a awm thei tih an sawi.
Nilaini khan Defence Minister Shinjiro Koizumi chuan Kumamoto-ah hian air conditioner 300 thawn turin a ti a, heng zinga 150 hi evacuation centre-a dah tur a ni.
Evacuation centre-ah hian mi 9,000 vel an la awm mek a, chhungkaw 30,000 velin Nilaini thleng khan power an la nei lo bawk.
Nghing nawn pawh vawi 100 chuang a thleng tawh a, tam tak chu chhiatna thleng leh thei hlauh vangin car-ah an riak hlawm.
Mi zawng leh chhanchhuah hna thawk turin mi sang chuang an che mek a. Tam tak chuan a tuar na ber, a chhawng hnihna thenkhat chim ta, Kashima-a Aeon shopping centre chu an hai a ni.
Lir a nghin hnu lawkah hian na takin a puak zui a. Aeon president chuan gas puak ‘a nih hmel’ tih sawiin chhui mek a ni.
Kumamoto-a Aeon mall hi siam that a nih hnuah thla hmasa khan hawn leh chauh a ni a. April, 2016-a lirnghing na tak, mi 278 thihna thlengah khan a chhia a ni.
Chhanchhuah hna thawktute hian Yatsushiro khawpuia Nippon Paper siamna pawh an dap a, thenkhat chim avangin mi panga vel thi an awm tawh.
A chhungah hian mi 11 an tang a, mi pasarih erawh chhanchhuah an ni tawh niin Nippon Paper chuan a sawi.
Lirnghing hi lei hnuai km 10-a thuk atanga iuntan niin Kumamoto puma chengte a sawi a ni.